Ministerio Publico ta splica pakico e pago halto aki
ORANJESTAD (AAN): Corte di Prome Instancia a tuma decision den e caso contra ex-Ministro Benny Sevinger, unda a dicidi cu e tin di bay paga pais Aruba e suma di 840 mil pico Florin.
Placa cu el a haya ilegalmente pa su propio beneficio, y esaki ta bin debi cu el a haya e suma halto aki for di delitonan penal, e.o. soborno y malversacion.
Tabata dia 12 di Juli 2024 cu Corte Comun di Husticia a trata e caso di apelacion di ex-Ministro den e Caso Avestruz aki, y a dune un castigo parcialmente condicional di 48 luna di prison, ademas a perde derecho di fungi un posicion oficial den gobierno.
Ex-Ministro a dicidi hiba e caso pa Casacion na Hulanda. Ainda no ta conoci pa ki tempo e sentencia di Casacion lo wordo duna.
Pero ley ta ofrece e posibilidad, pa mientras bo ta sperando e sentencia di Casacion, cu por tuma un decision caba riba placa cu a wordo obteni ilegalmente danki na e delitonan cometi. Y esey ta loke a socede riba Diahuebs mainta cu e sentencia di Hues.
