Caso Avestruz ta encera acusacionnan grave
ORANJESTAD (AAN): Diahuebs mainta despues cu Corte den Prome Instancia a dicta sentencia den e caso di ontneming cu Ministerio Publico a cuminsa contra e sospechoso, ex-Ministro Benny Sevinger den investigacion Avestrus. Huez a bay de acuerdo e confiscacion di alrededor di 840.000 florin.
Poco despues Ministerio Publico a duna nan comentario. Nan a splica cu anteriormente e ex-Ministro a wordo condena pa Hof den apelacion, pa un castigo di prison di 48 luna, di cual 12 luna ta condicional cu un tempo di prueba di 3 aña.
Hues a dicidi ademas cu el a perde e derecho di participa na eleccionnan y e derecho pa ocupa cualkier cargo publico pa un periodo di 5 aña di tempo.
Relaciona cu e condena cu ex-Ministro Sevinger a haya, Ministerio Publico a entrega un peticion pa kita rond di 900.000 florin di e sospechoso. E mayoria di e suma aki ta consisti di rikesa inexplicable cu S. a dispone di dje. Otro parti ta trata di donacionnan cu S. supuestamente a ricibi directamente relaciona cu actonan castigable pa ley.
E caso Avestrus ta encera acusacionnan grave contra e ministro de Infraestructura anterior y trece gran impacto social cu ne. Cu e ontneming aki e suma di 840.000 florin lo bolbe bek pa Pais Aruba.
