Pronto lo firma MOU:
ORANJESTAD (AAN) – Minister di Salud y Turismo, Dangui Oduber, Diahuebs mainta a duna informacion tocante otro proyecto cu gobierno ta bay desaroya. Den e caso aki ta trata di antes edificio di DOW, na Paardenbaaistraat.
E mandatario a referi na e edificio aki como un cu tin mas di 15 aña abandona, y e bista cu turistanan ta haya ora nan yega cu barconan crusero, y no ta e impresion cu Aruba kier duna cu tin un edificio abandona, ya caba pa 15 aña.
Minister Oduber a bisa cu pa algun tempo caba, gobierno a cuminza haci nan diligencianan pa explora e posibilidad pa Aruba Ports Authority (APA) tuma over e edificio aki, teniendo cuenta cu nan ta bezig pa cuminza cu e destaho publico di Port City. Y caminda unda APA ta situa actualmente, e tereno cu ta parti di Port City, consecuentemente ta haci cu APA mester muda y busca un edificio nobo. Den combersacionnan entre Ministerio di Turismo y Aruba Port Authority ta tumando lugar, pa cuminza sondea otro ubicacion y nan a pensa riba e ex-edificio di DOW.
“Y despues di esaki nos a sigui e combersacionnan pasobra nos a pensa, teniendo cuenta cu APA no tin hopi trahador, cu por haci uso di henter e espacio di e prome y di dos piso. Nos a bin na e idea di laga Aruba Port Authority haci uso di e di dos piso, y e prome piso laga Aruba Tourism Authority huur esaki for di APA, y convirti’e den un centro di informacion pa bishitante, cu lo bira uno hopi moderno y luhoso, unda tur turista crusero cu yega Aruba, por haya tur informacion tocante kico tin pa haci na Aruba, kico ta e actividadnan turistico, unda tin bon restaurantnan, cual ta e miho beachnan, haya un guia di biaha, ora nan baha for di e barco crusero”, e dignatario a comenta.
El a agrega cu ya caba a presenta e plan aki na Conseho di Minister y a haya su aprobacion. Lo bay publica na Lands Courant tambe, pakico gobierno a scoge APA pa desaroya e proyecto di ex-DOW, y dentro di poco despues cu e informacion aki wordo publica den Lands Courant, lo bay over pa tene un ceremonia pa firma e MOU entre Ministerio di Turismo, Gobierno di Aruba, Aruba Port Authority, Aruba Tourism Authority y tambe Monumenten Bureau, pa asina bay sondea y explora e posibilidad e aña aki ainda realiza un groundbreaking, pa asina renova henter e edificio den uno hopi moderno y luhoso, cu henter pueblo por ta orguyoso di dje.
