Un enseñansa cu hulandes como e unico idioma di instruccion
ORANJESTAD (AAN): Dr. Joyce Pereira, di Fundacion Lanta Papiamento, durante un lectura den cuadro di Dia di Idioma Materno realisa na Fundacion Rancho, a duna di conoce cu dia cu Aruba a haya su autonomia na 1954, gobierno a bay di acuerdo pa carga tur responsabilidad pa loke ta enseñansa.
El a agrega cu esaki ta algo cu a resulta masha dificil mes. A hereda un sistema di enseñansa cu na e momento ey tabata existi casi 140 aña caba. Tur frustia, obsoleto, pero e tabata tey ainda, a remarca.
E enseñansa aki tabata tin masha hopi problema cu for di cuminsamento tabata conoci. Pero nunca no a haya e atencion necesario. Un enseñansa cu idioma di instruccion na hulandes como e unico idioma di instruccion. Hulandes cu pa mayoria alumno tabata y ta ainda un idioma stranhero cu e no ta tende niun caminda, na scol so, a bisa. Hopi hende a critica e sistema aki, Joyce Pereira a señala.
Pero nada no a cambia te dia di awe, a expresa. Tin algun intento, pero el a keda na intento. E hecho ta cu tin un enseñansa cu semper a ignora e idioma di mayoria di alumno, esta Papiamento. Y cu semper a duna mas balor na otro idioma. Hulandes, Ingles, Spaño y hasta Frances tabata semper den e enseñansa na Aruba, cu excepcion di Papiamento, e idioma di pueblo.
Dr. Joyce Pereira a sigui bisa cu te hasta ta asina cu a haya un documento di notario cu ta data di siglo 19 y a keda copia, copia y djis cambia e sistema di imprenta y tin'e te dia di awe cu ta bisa cu tur documento di notario mester ta na hulandes of cualkier otro idioma, pero no den e idioma di e pais, esta Papiamento y nan ta uz'e te dia di awe, a remarca.
