Artista Tueska a uni nan bek
ORANJESTAD (AAN): Nan a yega di bishita Aruba na numeroso ocasion den pasado. Awor a bin sali na cla cu e ex-integrantenan di Las Chicas del Can, y e artista Tueska a uni bek pa haci varios proyecto como homenahe na e legendario grupo musical.
E grupo Las Chicas del Can a bira famoso den decada di 1980, pero a wordo crea pa e cantante Belkis Concepcion for di 1976 caba, creando e grupo ‘Las Muchachas’. Cinco aña despues el a uni cu e artista Wilfrido Vargas pa asina lanza na final di 1981 e grupo di Las Chicas del Can.
E grupo a stop na 1998. Na aña 1999 a purba lanta e grupo bek cu cantantenan Dominicano biba na New York, pero no a logra hopi y a stop mesun aña bek.
Pero e grupo a haya bida atrobe di 2007 te cu 2011 cu ‘nuevas’ Chicas del Can. Den e grupo aki, e cantante Maria Alejandra Tueska a forma parti di 2008 te 2009, y despues a bandona e agrupacion pa lanza su mes como solista y artista.
E artista Tueska di 35 aña di edad, kende a nace na Barranquilla, ta un actriz conoci e.o. pa “Mi Suegra y Yo” di aña 2016 y tambe ‘El Plan Perfecto’ di 2017.
Awor un biaha mas, varios ex-integrante di e grupo a regresa studio di grabacion invita pa Tueska pa duna bida na un proyecto musical nobo. Esey ta den forma di e cancion “Tú no me entiendes”, un merengue fresco y moderno cu ta fusiona elementonan urbano y pop, y na man di e conocido producer Henry Jiménez.
E cancion componi pa Rudy Ventura y Henry mes, ta un mezcla vibrante cu ta mantene e esencia tradicional di merengue, cu un giro contemporaneo, cu ta perfecto pa haya bek fanaticonan di semper, y tambe atrae generacionnan nobo.
E cancion ta contene participacion di Tueska, Michel Flores (den duo), y voznan di Florangel, Grissel Báez, Luisanna Grullón, Jamely Martinez, Mabel Peguero, Belkis Concepcion (piano), y Teresa Dominguez, e cantante hopi conoci como Juana La Cubana.
Awor cu e tema musical “Tú no me entiendes”, e artistanan talentoso aki a tuma e siguiente paso den nan carera musical cu ya ta wordo toca riba varios plataforma digital. Esnan cu kier scuch’e por bay na e website aki:
Pues e “Reencuentro de Las Chicas del Can”, ta un iniciativa lidera pa cantante Tueska, y tabata un momento cu a conecta tres generacion di e orkesta femenino pionero den merengue dominicano. E lanzamento di e cancion a tuma lugar na Teatro La Fiesta di Hotel Jaragua na Santo Domingo, y mesora a haya admiracion di publico, y nan a hasta canta den coro nan cancionnan faborito. Tin plan pa ripiti esaki pa un presentacion nobo den mesun Teatro, pa Diabierna 21 di Februari 2025.
