Pensionado mester busca plachi cu ta pertenece na dje!
ORANJESTAD (AAN): Aunke e automobilistanan cu ya a busca nan Plachi di Number danki na cita cu nan a haci online, ta papiando hopi positivo di nan experiencia di haya plachi rapidamente na DIMP, ta hopi keho tin awor riba e forma cu ta trahando cita, y principalmente pensionadonan cu ta confronta dificultad pa haci cita online.
Desde December caba, Departamento di DIMP a anuncia cu lo bay reparti plachi segun cita, y cu nan a traha 3 diferente Agenda di Cita pa pueblo di Aruba. Tin un Agenda pa pensionadonan. Tin un Agenda pa personanan priva. Tin un Agenda pa companianan.
E companianan cu no ta eenmanszaak, DIMP ta atende cu cita riba Diasabra, y cada compania por busca pa cada cita un maximo di 25 plachi di number. Pero tin companianan cu tin basta auto (algun tin hasta 1.000 auto), y nan tin di haci mas cu un cita. Ta atende companianan riba Diasabra, pa asina laga dianan di siman habri pa por yuda cu e masa di publico.
Den siman, tur dia den e prome oranan di mainta (8:00 am pa 9:00 am) ta yuda atende citanan cu pensionadonan na un forma cu nan no mester warda hopi, y resto di dia ta atende cita di personanan priva.
Riba e dia di cita, nan lo yega y rapidamente haya nan plachinan. Aworaki nan ta compronde cu tin dificultad ora di busca un cita. Pensionadonan no mester ‘upload’ riba internet copia di nan prueba di pago, y tampoco prueba di aseguro.
E keho cu tin di warda te April ta berdad. Pasobra ya caba esnan cu a haci cita mas trempan, a logra haya fechanan di Januari, a haya fechanan di Februari, a haya fechanan di Maart, y awor ta April, cualnan ta casi yena caba tambe.
Meverly Romano a splica cu ta hopi druk, pasobra ta atende automobilistanan haciendo pago di Plachi di Number, y ta atende esnan cu ta bay te na Balie pa traha cita pa busca plachi, y esey ta pasando tur dia.
E problema no ta e Pensionado riba su mes, pasobra segun señora Romano, den nan experiencia di tur aña, e Pensionadonan ta e personanan di mas agradabel y mas leuk, y nan ta e personanan ‘mihor cumplido’ compara cu e restonan, pasobra nan ta esnan cu semper ta percura pa nan belasting ta paga na ora, semper nan ta paga di luna di September caba, pues semper ta cumpli. Pero loke ta pasando y loke por mira, ta cu nan famianan ta dunando nan e papelnan di auto tambe, pa e ‘pober machi y pober pachi’ bin busca nan numbernan. Esey ta loke ta pasando.
“Nos a setup Agenda pa pensionadonan pa nan busca nan mesun plachi,” Romano a indica. Pero awor den practica ta descubri cu e yiu- y resto di famia ta manda nan bay busca nan plachi tambe. Pa colmo tin pensionado ta bay pidi cita pa plachi cu no ta ni pertenece na nan. E ora ey nan no ta acepta e citanan aki.
Realmente e mester ta net robez. Den prome siman di cita, por a nota cu ta varios persona priva ta bay busca 5 plachi maximo, incluyendo plachi di nan mayornan (pensionado), pa asina yuda nan mas rapido.
Si acaso e pensionado bay busca 1 plachi di su mes, y 1 plachi di su yiu, esey si toch ta wordo acepta. Pero si e pensionado bay busca 2 plachi di otro hende, y p’e mes nada di plachi... esey no ta wordo acepta.
