ORANJESTAD (AAN): Recientemente Hunta di AHATA a gradici Ewald Biemans pa su 50 aña di dedicacion na Aruba Hotel & Tourism Association durante un almuerzo special pa celebra su contribucion.
Pa 5 decada, Sr. Biemans a funciona como miembro di e hunta cu un compromiso na integridad y responsabilidad. Como doño di Bucuti & Tara Beach Resort semper el a representa un ehempel exitoso di maneho sostenibel, dunador di trabao responsabel, y amor pa naturalesa. Su vision, conocemento y bos semper ta respeta y su apoyo fuerte pa e asociacion semper ta aprecia.
Despues di 50 aña, Sr. Biemans a dicidi di tuma su retiro di e hunta desde Januari 2026. Chairman of the Board, Paul Gielen, y Presidente Tisa LaSorte a regala Ewald Biemans un cuadra, di artista local, Suelyn Dankerlui, representando bunitesa di Aruba su naturalesa cu alavez ta palanca di nos economia.
Sr. Biemans a gradici e hunta y a recorda cu den su carera el a experiencia crecemento di Aruba su turismo di 15.000 bishitante te na 1.5 miyon, agregando: “Nos mester proteha loke a haci nos turismo posibel”.
