ORANJESTAD (AAN): E situacion cu a pasa na October aña 2020 cu Sra. Marisol Lopez-Tromp tabata un situacion unda Evelyn Wever-Croes no tabata tin problema cu ne. Asina Wever-Croes a indica dialuna atardi despues di a reuni cu Gobernador Boekhoudt.
El a bisa prensa cu de hecho Lopez-Tromp tabata bin cerca dje pa haci consultanan ora cu e tabata tin mester di cierto informacion.
E situacion a complica su mes na momento cu e tabata na Parlamento. Si e kier traha cu MEP, MEP ta dispuesto pa traha cu tur partido. "Ami a yega di traha cu señora Marisol Lopez- Tromp y nos a traha bon. Pero ami no tin problema y e no ta bay di persona pa persona. E ta bay pa e pais aworaki", a señala.
Pesey ta importante pa di nan banda nan indica cu cual partido nan ta desea di traha, kico ta e condicionnan cu nan lo kier pone pa mira unda ta yega, Wever-Croes, lider di partido MEP a declara.
El a laga sa cu e formacion di gobierno ta den man di personanan hopi responsabel y cu mester tin e miho desicionnan pa pais Aruba.
Ta berdad cu e por tuma su tempo, pero tin biaha esey ta necesario pa por tin un bon formacion.
Pakico na 2017 a tarda pa forma un gobierno? Wever-Croes a indica cu tin biaha ora cu ta trata di partidonan cu tin diferencianan den e programa y cu ta importante tin cu papia di nan pa por yega na un acuerdo riba kico si y kico no.
E tempo ey a yega na un acuerdo cu partido RED riba legalisacion di cannabis. Pero MEP a bisa cu legalisacion pa uzo recreacional no tabata un opcion. El a tuma tempo, pero a yega na e palabracion ey y a palabra cu ta hacie medicinal y no recreacional, a señala.
Actualmente e ley ta na Parlamento, a laga sa.
Tin cu yega na palabracionnan y ta bay tuma su tempo. "Duna nos espacio, duna nos e tempo, no ansha, no preocupa, no tin motibo pa rumoreahe ni pa preocupacion. Duna nos e tempo. Ora cu tin problema nos ta anuncia cu tin problema", a bisa.
