Pabien na Aruba su piscadornan: -ORANJESTAD (AAN) — Awe, 29 di Juni, ta recorda e Apostelnan Simeon Pedro y Pablo de Tarso, yama den e mundo Cristian Catolico San Pedro y San Pablo.
Nan dia ta wordo conmemora pa Iglesia Catolico di un manera solemn y pa e dos santonan hunto pa recorda e martirio cu nan a sufri na Roma, un 29 di Juni, fecha di nan morto y tambe e fecha di e traslado di nan relikia. Esaki ta un di e festividadnan di mas grandi di Misa Catolico y Orthodoxo.
Durante e ultimo decadanan, e celebracion aki a bira di gran importancia pa e ecumenismo moderno como un ocasion na unda e Papa di Roma y e Patriarca di Constantinopla, a oficia servicionan religioso diseña pa nan Iglesianan participa mas cerca, den inter-comunion, como un celebracion comun. Esaki a tuma lugar, specialmente, durante e pontificado di Juan Pablo II, manera ta aparece den su Enciclica “Ut Unum Sint” (25 di Mei 1995).
DIA DI PISCADO:
Manera Bijbel ta conta, Pedro y Pablo tabata dos piscado; di e pesca nan tabata biba, y na momento cu Jesus a pidi nan pa laga nan boto un banda y sigui’E nan a obedece y hasta a entrega nan bida difundiendo Jesus su Palabra.
San Pedro ta wordo considera e Patron di e Piscadornan, y pesey e Dia di Piscado ta wordo conmemora riba 29 di Juni, tur aña.
E fecha aki ta pa concientiza e comunidad tocante e labor duro y hasta peligroso di subi lama bruto pa pisca, e compromiso y valentia di tur e hendenan homber y muher cu ta dedica na e actividad aki, pa consumo propio y pa sobrevivencia door di haya entrada cu benta di nan pesca. E dia aki, generalmente tin un Santo Sacrificio di Misa, pa pidi San Pedro su bendicion y proteccion pa tur piscado riba lama.
Por corda e temponan cu na Aruba e Dia di Piscado tabata wordo celebra cu un actividad grandi na Centro di Pesca Hadicurari, en coordinacion cu Ministerio di Cultura y LVV (Santa Rosa), y organiza pa Byron Boekhoudt (Biologo Marino) y Castro Perez. Hopi famia tabata pasa nan dia eynan cu hopi alegria, y wardando e piscadornan bin cu pisca fresco fresco, cu mientras na Hadicurari mes nan tabata ofrece pisca haza cu funchi, masha dushi mes.
Mientras tanto, Rancho tabata organiza e competencia di boto miniatura, cu tabata capta e interes di hopi hende, adulto, hoben y mucha cu tabata bay wak esaki den e parti di lama, un poco pariba di Wilhelmina Park.
Ohala e pandemia di covid-19 lo keda atras pronto y definitivamente, pa bolbe disfruta di e tipo di tradicionnan aki, cu ta haci hopi falta pa famianan hunto por goza di entretenimento sano. Pabien na tur piscado riba nan dia awe, y na tur Arubiano cu ta carga e nomber di Pedro of Pablo.
