Ministro Maduro di Finansa ta informa den cuadro di e Landspakket:
ORANJESTAD (AAN): Minister Maduro di Finansa a reuni cu representantenan di Economisch Bureau Amsterdam kende nan ta haci un investigacion pa e Ministerio di Relacion Interior y di Reino (BZK) riba e maneho cu ta worde hiba pa BZK pa asina por yuda e Paisnan Aruba, Curaçao y Sint Maarten yega na un finansa publico sostenibel. Pa Aruba, BZK a haci uzo di e 'tool' di Protocol den cual ta pone normanan financiero pa asina por cumpli cu e meta pa Aruba por yega na un finansa publico sostenibel.
E intencion di e reunion tabata pa haya sa con den practica e Protocolnan entre Aruba y Hulanda a worde implementa y kico e resultado tabata. Tin varios Protocol cu a worde firma entre Aruba y Hulanda. Asina ta haya na aña 2013 e Witte Donderdag Akkoord y tambe e Protocol di aña 2015 cu normanan financiero cu despues a worde adapta y prolonga na aña 2018 y e mesun Protocol aki a keda prolonga un biaha mas na december 2021, memey di e pandemia.
Den e Protocol tin norma financiero pa e surplus, gasto di personal y nivel di debe. Tur cos ta mustra cu Aruba a cumpli cu e normanan financiero. Banda di e 'tool' di Protocol, lo investiga tambe con hopi Hulanda a yuda cu, por ehempel, asistencia tecnico y cu fianza na interes reduci, pa asina Aruba por yega na cumpli cu e meta proponi pa logra un finansa publico sostenibel.
Ta importante pa evalua e manera cu ta traha den Reino Hulandes y sigur pa Aruba ta necesario pa mira kico e resultado tabata di e Protocolnan firma cu Hulanda. Ta bon pa sa cu e supervision financiero di Aruba no ta cay bou di e 'scope' di e investigacion aki. Esaki ta debi cu e supervicion financiero di Aruba, contrario na esun di e otro Paisnan den Reino Hulandes, ta regla den e LAft cu ta un Ley di Aruba. E LAft no ta un 'tool'di BZK manera e RFT, cu ta e Ley di Reino cu ta regla supervision financiero na Curaçao y Sint Maarten.
Minister Maduro di Finansa lo keda pendiente pa e resultado di e evaluacion aki di e Protocolnan cu ta atende cu e supervision financiero di Aruba. Ta bon pa nos tur por sa si BZK a haci bon uzo di e 'toolsnan' na su desposicion y si e 'toolsnan' aki berdaderamente a cumpli cu e meta pa cual nan a worde uza, esta mehora e finansa publico di Aruba.
