Etlyn Winterdal gradua como Doctor den Chiropractic

Cu beca di Aruba Scholarship Foundation

ORANJESTAD (AAN): Despues cu Etlyn Winterdal a termina Havo na 2014, el a bay Merca pa studia pa Doctor den Chiropractic na Life University na Georgia. E mester a haci prome lesnan di ‘Nutrition’ pa e por cuminsa cu e estudio di Chiropractic. Despues cu el a finalisa e estudio di Nutrition, obteniendo su Bachelor’s Degree, el a cuminsa na october 2018 cu e programa di Doctor den Chiropratic. E estudio aki tabata necesario pa e por a studia Chiropractic na e University.

   Recientemente, dia 25 di maart 2022 e Ceremonia di Graduacion Cum Laude di Etlyn a tuma luga. Etlyn su scorenan academico y e contactonan cu ASF a demostra durante henter e periodo di su estudio na Life University cu e tabata un studiante tremendamente bon motiva, dedica y sumamente serio, mescos cu e otro becadonan anterior di Aruba Scholarship Foundation. Su puntonan en general (GPA) tur aña a sobresali hopi halto. ASF ta hopi orguyoso cu e gran logro di Etlyn. 

   Su experencia durante su estudio den un idioma stranhero, na un pais desconoci, leu fo’i cas, no tabata facil. Pa e motibo aki e mester a studia hopi duro pa e realisa su soño: “Doctor of Chiropractic”. Etlyn ta recomenda tur studiante cu ta bay Merca pa orienta nan mes seriamente na e universidad, prome cu start cu e estudio. E studiante mester percura pa e ta debidamente na altura di e curiculo y sigur di cuanto “semester” of  “quarter” un materia ta encera, etc.

   Etlyn ta sugeri tur studiante pa entrega despues di cada semester e nota di cifra oficial na ASF y tambe pa tene bon cuenta entre otro cu e parti financiero di e universidadnan na Merca y sigur pa semper keda den bon contacto cu ASF y e mayornan. Tur aña e costo di e universidadnan ta aumenta drasticamente.
   Etlyn Winterdaal su intencion ta pa pronto e regresa Aruba pa e brinda su servicio na comunidad.                                                     

   Na nomber di Presidente di Aruba Scholarship Foundation, Frits Goedgedrag, conhuntamente cu tur miembro di directiva di e organizacion, ta felicita Etlyn y su mayornan calurosamente y ta desea Etlyn hopi exito den su carera nobo, como prome “Doctor of Chiropractic” femenino na Aruba.