Estudio ta conclui cu capital humano venezolano ilegal por contribui cu 13 miyon dollar si nan pasa pa un proceso di regularisacion

Segun estudio recien di OIM ONU Migracion

ORANJESTAD (AAN):  Recientemente, OIM ONU Migracion a publica un raport importante tokante e impacto di migracion venezolano na Aruba. Segun e raport aki, mayoria di e poblacion migrante venezolano na Aruba ta den edad laboral productivo.

            Di nan, 56% tin un trabao temporal, 18% tin un empleo fiho (vast), y 17% ta sin trabao pero ta buscando activamente pa haya un empleo.

            E estudio ta mustra tambe cu 68% di e migrantenan kier mehora nan habilidad linguistico, cu 28% di nan tin un nivel avanza di Papiamento, y un 36% y 26% tin nivelnan intermedio y basico respectivamente.

            Tocante integracion socio-laboral, 45% ta desea inicia un emprendimento of empresa, y 63% ta busca activamente oportunidad nobo.

            E migrante venezolano na Aruba ta demostra nivel halto den habilidad manera trabao di grupo, diseminacion di conocimento y uzo di aparato tecnologico manera smartphone y tablet; habilidadnan cu ta util pa nan por drenta na e sector economico cu ta necesita man di obra, manera Sector Turismo.

            Encuesta realisa pa Equilibrium SDC21 ta mustra tambe cu e migrante y refugiado venezolano cu ta ilegal na Aruba ta den edad laboral productivo tambe, cu 43% di nan den edad di 36 pa 45 aña, y 25% den edad di 26 pa 35 aña.

            Considera e capacidad di e imigrante pa por tin y mantene un diversidad di empleo (29% ta trahado independiente, 61% ta trabou cu salario y 13% ta empleado), e situacion aki ta traduci na un gran potencial di desaroyo si un integracion socioeconomico efectivo tuma lugar.

            Segun un encuesta realisa door di Aruba Skills Profile, den cuadro di e raport aki 94,6% di e venezolanonan encuesta nan edad ta entre 25 y 54 aña. 60,4% ta hende muher y 39,6% ta hende homber.

            Finalmente, e estudio ta conclui cu e capital humano venezolano ilegal na e isla por contribui un potencial di US$13 miyon den mercado si nan pasa pa un proceso di regularisacion.