ORANJESTAD (AAN): Dr. Wilmer Salazar, Consehero na Departamento di Salud (DVG) tin su reaccion riba esnan cu ta protesta contra e vacuna di Covid-19.
El a bisa cu esnan cu a lesa tur loke tin di haber cu e vacuna, proteccion y efectonan adverso no a lesa bon of nan no kier compronde.
Dr. Salazar a enfatisa cu a splica hopi cla kico ta e efectonan di e vacuna y con pa proteha bo mes y con por tin e garantia cu e seguridad ta presente pa por proteha contra un malesa cu ta Covid cu ta prevenibel cu vacuna.
Mester realisa bon cu ora di haya e prik, e ta keda den e celnan di e musculonan di e brasa. E no ta bay ningun otro caminda. Loke e vacuna ta faborece ta e produccion di un proteina cu ta inmunogeno y pesey e ta proteha nos, a splica.
E problema aworaki ta e infeccion di esnan cu pa motibo di no kere den e vacuna ta hayando un problema di salud na cas, na hospital afectando su condicion fisico, su economia, entre otro, a bisa.
Salazar a aclarea cu e vacuna Pfizer of Moderna, ningun di nan ta produci coagulonan di sanger. Por a sosode cu un efecto raro a wordo publica, pero cu otro vacuna cu ta AstraZeneca di Janssen. Pero e porcentahe di presentacion ta asina chikito cu ta wordo yama un efecto no mucho comun of no frecuente basicamente den cierto grupo di hendenan.
El a enfatisa cu MRNA ta un mensahero y e ta duna un mensahe na e celnan den e musculo pa produci un proteina cu ta inmunogeno. E sistema di celnan ta reconoce e proteina ey como straño y ta mande pa tur e kliernan of cu ta produci anticurpa specifico contra e virus (spike). E ta bloki'e pa e no por drenta den otro celnan.
E ta traha preventivo. Pesey mester tuma e vacuna pa despues produci anticurpa y si ta bin contacto cu e virus e ta proteha bo, a señala. Un bes cu e vacuna (MRNA) ta drenta den e celnan muscular den e area unda ta prik pa asina duna e mensahe y pa despues destrui. E vacuna no ta bay ningun caminda sino pa e sitio specifico unda e ta manda e mensahe di produci e proteina cu ta inmunogeno, e experto a remarca.
