ORANJESTAD (AAN): Cosecha tin dos workshops na final di luna di augustus.
E workshops ta tuma lugar e delaster diabierna di luna, 27 di augustus. Uno ta tuma lugar den e centro creativo na San Nicolas y uno den nan centro creativo na Oranjestad.
Ta importante pa sa cu durante workshops na Cosecha tur precuacion di higiena y seguridad lo worde tuma en conexion cu Covid-19.
Diabierna 27 di augustus e artista local Merveline Geerman tin un workshop di mosaic unda participantenan por bin traha un reiger, na papiamento yama garsa.
E workshop aki ta pa esnan di 15 aña bay ariba, y ta di 6:00 pm pa 8:00 pm, y lo cobra un suma pa esaki. E workshop aki lo tuma lugar na Cosecha San Nicolas.
Tambe e piesa di garsa ta disponibel como pakete di DIY na un prijs atractivo. Delaster dia pa registra y paga pa esaki ta diabierna 27 di augustus y diabierna 3 di september por buska e pakete na Cosecha Oranjestad.
Riba e mesun dia, diabierna 27 di augustus, pero na Cosecha Oranjestad e pintor local Erika Moran lo duna un workshop di arte unda lo bay siña con pa pinta un curpa humano cu carbon. Durante e workshop aki lo bay tin un modelo presente cu ta esun cu e participantenan lo bay pinta.
E workshop aki ta pa esnan 18 aña bay ariba, y ta di 6:00 pm te cu 8:00 pm, y durante e workshop aki lo tin bellini, hors d'oeuvres y material di arte pa e workshop aki. Lo cobra tambe pa participa.
