Esnan cu ta bay vacuna no ta respeta e borchinan aki

ORANJESTAD (AAN): E dianan aki cu ta aumentando e capacidad di duna vacuna na Centro Deportivo Betico Croes na Santa Cruz, por nota con henter dia tin trafico hopi

congestiona den Santa Cruz.

   Mirando tur esaki, Gobierno hunto cu DOW a trece alivio, door di laga chauffeurnan drenta Centro Deportivo for di banda pabao, cu un entrada for di  Papilon banda pazuid.  Full e veld di santo banda pabao a haya asfalt.

   Sinembargo toch tin hende cu ta bin para banda pariba, y loke ta mas notable ta cu algun chauffeur ta djis yega y staciona nan vehiculo dilanti e negoshinan eybanda, incluyendo e Botica aki.

   E Botica aki ta net na e entrada banda pariba di Centro Deportivo Betico Croes.  Aunke a pidi pa tur esnan cu ta bay vacuna drenta banda pazuid (sede di MEP bay pabao), toch hende ta para eynan.  Pesey awor gerencia a pone e borchinan aki, pa asina percura cu ta laga espacio habri pa nan clientenan.

   Pero bo por mira, cu ni maske cu tin bochi poni tur caminda cu e espacionan ey ta pa clientenan di Botica, toch hopi chauffeur no ta respeta nan.  Ta parce comosifuera cu nan ta kere cu por staciona unda cu ta.  E momento a yega pa mas hende cuminza corda riba nan deber civico.