Directora di Departamento di Impuesto:
*134 miyon tin habri na debe di BBO
ORANJESTAD (AAN): Luenne Gomez-Pietersz, Directora di Departamento di Impuesto, a duna di conoce cu pa loke ta trata cobransa di impuesto tur hende tin nan opinion. E ta haya importante cu tur hende tin cu cumpli pasobra enfasis ta wordo poni riba cumplimento di impuesto.
El a bisa cu 'compliance' of cumplimento ta un responsabilidad mutuo y ta un responsabilidad di Departamento di Impuesto pa percura hende ta registra den nan sistemanan y ta paga. Pero tambe ta un responsabilidad di e mesun comercio cu ta tira den cara di DIMP bay percura pa 'compliance', kico nan ta haciendo pa esnan cu ta afilia na nan organisacion pa concientisa nan cu 'compliance' ta hopi importante.
Gomez-Pietersz a laga sa cu si e ta wak e cifranan di 'compliance' ta algo di spanta. Esakinan ta cifranan cu no ta hendenan cu ta keda sin haci 'aangifte'. Ta companianan cu ta haci 'aangifte' di loonbelasting y BBO y cu no ta paga segun nan mesun declaracion ta stipula.
A agrega cu te cu Juli, por ehempel, den luna di Januari te cu Juli tin 3553 compania of pagadornan di belasting cu no a paga nan loonbelasting segun cu nan mesun declaracion ta declara pa nan paga.
A saca 42824 cobransa (naheffingsaanlag) na un suma total cu boet di 88 miyon Florin. Esaki ta te cu Juli 2022. Pa loke ta BBO tin e mesun tendencia y tin 5279 contribuyente cu no a paga nan belasting. Tin 42899 cobransa cu boet na un suma di 134 miyon Florin habri na BBO cu no a wordo paga segun cu e formulario di BBO mes ta declara, Gomez-Pietersz a duna di conoce.
El a bisa cu DIMP ta haci su parti y si un hende ta entrega su aangifte di BBO y ta wak cu tin cu paga 30 mil florin, por ehempel, y DIMP no ta wak cu el a paga 30 mil florin, ta saca un cobransa cu boet pa asina, e contribuyente paga su BBO.
Esey ta e trabao doi DIMP, pero e a haya cu e gremionan, mescos cu por tin conferencianan caminda ta concientisa riba e responsabilidad mutuo pa cumpli cu impuesto. "Pasobra si nos tur paga, eventualmente nos tur ta paga menos y gobierno no ta haya su mes obliga ta hisa tasanan di impuesto pa e por haya su entradanan".
Ora cu hopi hende no ta pagando ta haciendo negoshi zwaart, ta huur nan camber sin paga toeristenheffing of sin paga grondbelasting, sin declara esaki den Inkomstenbelasting ta haya cu e gobiernonan ta bay haya nan mes obliga di subi e tasanan di impuesto pa por lora gobernacion pa nan por tin un balans den nan presupuesto, den gastonan y entradanan, e directora di DIMP a declara.
