Esfuerso di gobierno pa baha prijs di awa y coriente ta continua

Minister Glenbert Croes:  

*Reunion cu minister Wopke Hoekstra tabata positivo 

ORANJESTAD (AAN)-Minister di Labor, Energia y Integracion, Glenbert Croes a reuni cu Minister di Relacionnan Exterior di Hulanda señor Wopke Hoektsra riba diferente tema importante, principalmente e tema di energia.

            Pa Aruba e ta importante pa ricibi apoyo di gobierno di Hulanda pa Aruba por cana e caminda cu gobierno Mericano, pa cumpra combustibel pa WEB na un miho prijs. Esaki lo tuma lugar via companianan RDA y FMSA, cu e meta pa reduci prijs di awa y coriente pa comunidad di Aruba.

            Minister Croes a expresa di ta contento cu e contribucion y comprension di Hulanda pa loke ta trata e tema di energia. Alabes a pidi e apoyo pa introduci Aruba na e multinacionalnan di hidrogeno na Hulanda pa asina Aruba por incorpora e compania di hidrogeno den e masterplan energetico pa e re-desaroyo di e zona di refineria. Esaki en bista cu tin dos Minister cu lo ta atendiendo un conferencia di Hidrogeno fin di November na Hulanda.

            Unabes cu tin e capitulo di hidrogeno incorpora den e plan di energia nacional, gobierno lo haci e anuncio grandi na comunidad, pa loke ta trata e reactivacion di refineria y otro companianan, cu lo trece desaroyo grandi pa Aruba.

            Segun Minister Glenbert Croes, e reunion a bay den bon atmosfera y tabata uno positivo. “Nos ta agradecido pa e forma con e la contribui y tende den discusionnan analisis di e temanan cu nos a trece padilanti” Minister Croes a expresa.