ORANJESTAD (AAN): Matutino DIARIO ta ofrece su disculpa cu debi na motibo logistico den diagramacion,
e potret di e esnan cu a ricibi donacion di WEB Aruba NV durante e ceremonia di groundbreaking a keda fo’i e edicion di Diasabra cu a pasa.
Manera a ser treci dilanti, dos siman pasa a tuma lugar un evento na e lugar di Tanki di Alto Vista pa conmemora e fase di construccion di e tanki di awa nobo. E proyecto di ‘Tanki Alto Vista’ ta forma parti di WEB Aruba NV su proyecto ‘Upgrade Aruba Water Distribution Network;’ un proyecto grandi cu ta encera renobacion di tankinan, pomp y tuberia rond nos isla, pero tambe den planta di WEB.
E tanki nobo lo tin un capacidad di 18.800 m3 (cu ta 6.500 m3 mas cu esun bieu) y lo garantisa un suministro regular di awa pa e demanda creciente den e area di Noord.
Como muestra di aprecio y pa celebra inicio di proyectonan nobo, WEB durante e ceremonia a haci donacion di Afl. 5.000,- na Bubali Voetbal Team, Team di Futbol Nacional Hubenil, CBN Eagles Baseball Team, Hammer Shark Baseball Team, y Kinderhuis Imeldahof, pa asina contribui na un comunidad sostenibel.
Ademas, contratista principal ‘Florida Aquastore,’ a haci un donacion di 2.900 Dollar na e fundacion local, Ban Uni Man pa Cria nos Muchanan, pa contribui na alimentacion saludabel na muchanan cu ta bay scol sin algo di come.
https://diario.aw/categories/noticia/general/esakinan-a-haya-donacion-durante-evento-di-web-riba-sero-di-alto-vista#sigProId74aded9674