Esaki na Papiamento ta wordo yama ‘Mulato’

Haya sa mas di pisca rond di Aruba

ORANJESTAD (AAN): Ban papia di nomber di pisca. Bo conoce bo piscanan Un serie di articulo informativo cu ta ilustra algun pisca y nan nomber na Papiamento.  Tur esaki pa cortesia di Santa Rosa.

   Den e prome salida aki kier djis introduci e concepto. Ta asina cu con bo ta yama un pisca ta depende hopi biaha di ken bo ta papia cune y pesey nomber comun ta varia di area pa area y region pa region. Por ehempel tin caso cu mesun pisca tin otro nomber na Curacao compara cu Aruba. aki tambe tin pisca cu ta conoci bou diferente nomber. Den e serie aki Santa Rosa kier comparti y alavez haya informacion for di publico. Lesa na final di articulo con pa haci esaki.

   Mulato, Acanthocybium solanderi, Wahoo: Mulato, tambe conoci como Mula, ta un pisca hopi comun den nos awanan y mercado di cuminda y restaurantnan. Mulato su nomber cientifico ta Acanthocybium solanderi y ta un miembro di famia di Scombridea, esta e famia cu ta inclui Tuna, Conofes y Macrel.

   Un grupo  di pisca di importancia rond mundo pa alimentacion y ta ser usa tanto den mochi, filet pero tambe empaketa den e.o. bleki. Na ingles e nomber mas comun ta Wahoo. E ta masha popular como pisca di pesca deportivo y recreativo pa su resistencia y pelea cu e ta duna unabes gara na liña.

   Descripcion: Mulato ta un pisca largo, diferente grado di shinishi y cu blou. Hopi biaha bo ta hayele cu strepi mas scur di ariba bin abou. E boca ta largo y ta liña cu djente skerpi manera blet. Nan ta pisca di careda, esta traha pa landa distancia largo y cu hopi velocidad. Pesey nan diseño, largo manera torpedo y cu fin chikito a lo largo di lomba te na rabo. Nan rabo tambe ta fini manera luna nobo, y cual ta corta awe pa bay dilanti rapidamente.

   Na Aruba: Mulato ta ser haya den nos awanan rond nos isla henter aña largo pero tin un halto resaltante den e temporada aki, esta di november te cu maart. Mulato ta ser gara aki na Aruba mayoria di biaha via di e metodo di slip (trolling na ingles) unda ta lastra e liña cu e haas of pluma tras di e boto en busca di e pisca.

   Contacto cu Santa Rosa: Ta intencion pa periodicamente Santa Rosa saca mas informacion pa tocante di nomber di pisca na Papiamento. Si bo tin informacion of comentario pa engrandece conocemento of si ta desea informacion of topico specifico pa nos amplia ariba, por manda esakinan libramente na This email address is being protected from spambots. You need JavaScript enabled to view it..

  Si bo mes ta piscado y bo kier comparti bo captura di e pisca en cuestion, sea liber pa manda esaki pa nos considera publike’le.