Era nobo a yega pa asunto di awa sushi

Ministro Ursell Arends satisfecho

ORANJESTAD (AAN): Gobierno di Aruba a trata e ley di traspaso di e tres plantanan di RWZI (Rioolwater verzuiverings installatie), y e incinerador na Parkientebos pa e entidad nobo, Aruba Wastewater Sustainable Solutions N.V. E paso di e ley aki ta refleha e boluntad politico y compromiso pa trece cambio sustantivo pa mehoracion den maneho di desperdicio di awa preto.

   Pa mas di dos decada e problema di RWZI a bin ta tuma un stoel secundario ora ta papia di prioridad. Na momento di a forma Gabinete Wever-Croes 2, a scohe pa crea un ministerio cu lo ta encarga cu medio ambiente y naturalesa. Como parti di formacion e partidonan MEP/RAIZ a acorda tambe cu RWZI ta un asunto di prioridad pa e gabinete nobo. Nan a bay di acuerdo cu ambos partido lo atende cu e asunto aki hunto.

   Asina RWZI a keda formalmente parti di e cartera di Infrastructura (MEP), pero Ministerio di Naturalesa (RAIZ) lo keda directamente envolvi den trece e solucion pa e situacion. A yama esaki “traha horizontal”.  Minister Ursell Arends cu a tuma e cartera di naturalesa a insisti desde inicio cu e impaco ambiental no ta aceptabel y a persisti ariba e urgencia pa yega na un solucion na e planta di purificacion di awa preto, RWZI. Esaki sigur ta un tema cu mas biaha Minister Arends a bay parlamento p'e. 

   RWZI ya pa casi 20 aña tabata un urgencia nacional pa cual motibo Minister Arends a remarca hopi biaha cu no por warda mas. Mantencion a cay atras y e planta a bira chikito pa e volumen grandi cu e mester procesa. Apesar di e estado financiero fragil di Pais Aruba, a keda busca solucion pasobra inversionnan mester worde haci pa no solamente mantencion pero expansion. Tambe tin cu remarca cu Aruba su poblacion a crece drasticamente desde 1972 cual te aña cu a construi e planta di RWZI na Bubali.

   Di e tres plantanan di RWZI, ta esun na Bubali ta carga e mayoria di e volumen di awa preto. RWZI Bubali a worde diseña pa procesa 4.500 m³ awa sushi pa dia, mientras cu awo e ta ricibiendo mas cu 8.000 m³ di awa sushi pa dia, causando problema di capacidad serio. Ciudadanonan y bishitantenan di nos pais por wak y hole e consecuencia di e esaki. Similarmente e RWZI na Parkietenbos tambe a caba di sobrepasa su capacidad. P'esey ora den Parlamento a puntra, ki pura Gobierno di Aruba tin pa e ley aki pasa, e contesta ta claro, pa asegura ciudadano nan salud y nos medio ambiente.

  Mayoria den Parlamento a vota na fabor di e ley, priorisando esaki como un iniciativa clave cu empuhe di Ministerio di Naturalesa. "Trahando den colaboracion entre ministerionan di gobierno ta haci mas eficiente pa nos adresa e asuntonan critico aki,” Minister Arends a menciona. Awo cu e ley a pasa, desperdicio di awa preto por worde procesa pa recursonan sostenibel. 

  Gobierno di Aruba a actua cu prudencia y e enfoca riba solucionnan pa salvaguardia nos recursonan natural. Poniendo interesnan partidista un banda y enfoca ariba e interesnan di Aruba su economia y medio ambiente.  Ta importante pa remarca cu Aruba su medio ambiente tin impacto directo cu Aruba su unico pilar economico, Tursimo. Solucionando e peliger di RWZI lo tin efecto directo y positivo riba nos economia. Cu sosten di stakeholder di e sector turistico, sector priva y partnernan internacional, incluyendo finaciamento di Hulanda, Gobierno di Aruba finalmente por implementa plannan sostenibel pa soluciona e problema di RWZI.