ORANJESTAD (AAN): Ora cu cancer ta afecta un adulto menor di 50 aña, e mediconan ta yama esaki un caso di inicio tempran. E cancernan aki na un edad mas jong ta cada bes mas frecuente.
Un revision nobo di e registronan di cancer di 44 pais a revela cu e incidencia di e cancernan di inicio tempran ta aumentando rapidamente den e caso di cancer 'colo-rectal' y di otro 13 tipo di cancer, hopi di cual ta afecta e sistema digestivo, y e aumento aki ta sosodiendo den hopi pais di ingresonan medio y halto.
E autornan di e estudio ta afirma cu e aumento den e adultonan jong tin di haber den cierto forma na e hecho cu e pruebanan di deteccion di algun tipo di cancer, manera esun di tiroide, ta mas sensibel. Pero e pruebanan no ta splica henter e tendencia, asina ta bisa e co-autor Shuji Ogino, profesor di Patologia na e Scol di Salud Publico T.H. Chan, di Harvard.
Ogino a afirma cu e aumento ta debi na un mezcla di factornan di riesgo cu probablemente ta actua conhuntamente, algun conoci y otronan cu mester wordo investiga.
Ogino tambe a señala cu hopi di e riesgonan aki tin vinculonan estableci cu cancer, manera obesidad, inactividad, diabetes, alcohol, tabakismo, contaminacion ambiental y e dietanan occidental rico den carni cora y sucunan añadi, como tambe pa e trabao den shiftnan y falta di soño.
"Y tambe tin hopi factor di riesgo desconoci, manera un contaminante o e aditivonan alimentario. Niun hende sa ", ta afirma.
Ogino ta kere cu e hecho cu hopi di e cancernan aki, 8 di 14 studia, ta afecta e sistema digestivo ta apunta riba un papel importante di e dieta y di e bacterianan cu ta biba den nos intestino, conoci como microbioma.
