ORANJESTAD (AAN): Fundacion Movimento ta bida (FMTB) kier anuncia na tur e fanaticonan di bon fiesta cu e aña aki diadomingo dia 30 di October
nos ta celebra e final di e luna di Adulto Mayor cu un Fundraising “Back to the 60’s 70’ and 80’ Party” den Renaissance Convention Center for di 2or di atardi te cu 7or di anochi.
Manera tur aña e fiesta aki lo hiba bo back den tempo y laga bo pasa un atardi inolvidabel.
Fundacion FMTB a tene cuenta cu tur hende y a baha e prijs di entrada te na cincuenta Florin pa persona, dunando asina back na tur esnan cu semper a yuda nos, yuda otro.
Lo bay tin 4 banda fuerte hunto cu Genie Disco cu e legendario Edwin, cu lo demonstra cada uno loke nan tin aden y specialmente con bon nan por laga bo balia ,canta y goza. The Strangers, Reflection Band, Back on Track y The Kiwanis Band lo tei presente pa hiba tur hende den trance formal gozando di e añanan 60 te cu 80.
Ban back den tempo di Shindig y Flower Power. Temponan dushi di Aruba unda fiestanan tabata cuminsa diadomingo merdia 2’or . Ken no ta corda e fiestanan den Club Surnam, Club Orquidia, Bonaire Club, Eagle Club , Strand Hotel y hopi lugarnan mas rond di Aruba unda e teenagernan tabata goza.
Ambiente lo ta bay tin Diadomingo 30 di October den Renaissance Convention Center cuminsando for di 2or te cu 7or. Un bataya fuerte di e bandanan caminda nos tur lo pasa un atardi sumamente agradabel topando amigo y amiganan di e tempo ei. Pa esnan cu no ta di e tempo ei lo ta bon pa bin e fiesta aki pa mira con juventud tabata goza antes den fiesta.
Busca bo carchi na Cliffix y na oficina di FMTB den edificio di IBiSA.
Corda cu entrada ta limita dus cumpra bo carchinan na tempo pasobra e fiesta aki no ta bay worde ripiti. Baliamento ta sumamente bon pa tur hende asina ta no keda cas.
