ORANJESTAD (AAN): Durante un conferencia di prensa Diahuebs pa lanzamento di Aruba Signature Experiences di ATA, director di EPI Ryan Maduro tambe a hiba palabra.
El a gradici Minister di Turismo Dangui Oduber, Credits Aruba y ATA pa e tremendo proyecto aki.
“Como director di EPI mi ta hopi contento di forma parti di e proyecto aki”.
E colaboracion entre Credits y EPI no ta desconoci, mirando cu nos tin algun aña caba ta traha hunto.
Nos tin un programa cu yama ‘Be Your Own Boss’ y esey basicamente ta duna tur empresario cu tin gana di siña di ta un entrepreneur e herment y conocimentonan necesario pa nan por haci esaki un realidad, segun Maduro.
El a bisa cu e rol di EPI den e programa aki ta pa duna conocimento mas profundo na e entrepreneurs cu ta bay forma parti di e proyecto aki den sentido cu EPI ta bay maneha e ‘Small Business Academy’.
Segun Maduro, e Small Business Academy basicamente ta un programa mas profundo di locual EPI ta ofrece caba den Be Your Own Boss.
Small Business Academy ta bay mas profundo y ta mara na e proyecto di ATA.
E director a splica cu e programa ta core 10 siman largo, unda cu dos biaha pa siman lesnan ta wordo duna, tanto online, como tambe na e scol mes.
