Director di EPB Oranjestad na Hato, Erwin Lopez:
ORANJESTAD (AAN): Alumnonan di MAVO cu tin intencion di cuminsa nan estudio na EPB e aña escolar aki, por inscribi inmediatamente despues cu scol cera. Durante dianan 15, 16 y 17 di juli, EPB lo habri su porta pa registra alumnonan di MAVO. Muchanan di scol basico cu mester inscribi tambe ta bon bini pa pasa na EPB Oranjestad na Hato durante e dianan aki y den e orario regular di scol.
Inscripcion no por wordo haci online. Tur interesado mester presenta personalmente na EPB Oranjestad na Hato pa completa e proceso di registracion.
Director di EPB Oranjestad na Hato, señor Erwin Lopez, ta haci un yamada na alumnonan di MAVO pa no laga inscripcion pa ultimo momento y pa yega na tempo. El a splica cu e opleidingnan ta yena segun e cantidad di registracionnan cu ta drenta. Esaki kiermen cu alumnonan cu tarda mester scoge un otro direccion di estudio si e opcion preferi a yena caba.
Segun Lopez, ainda tin espacio disponibel den tur opleiding. Electro ta entre e direccionnan cu ta yena mas lihe, principalemente door di alumnonan di EPB mes. Tambe ainda tin lugar disponibel den direccionnan di Cuido, Servicio y Koki, cu actualmente ta entre e opcionnan mas popular.
Pa alumnonan cu tin interes den tecnologia, Lopez a indica cu EPB San Nicolas ta ofrece e programa ICT Support. E programa aki ta prepara studiantenan den area di computernan, rednan, cloud computing, mantenimiento, instalacion, solucion di problema y otro habilidadnan tecnico cu ta importante pa e mercado laboral actual.
EPB ta anima tur alumno interesa, pa registra na tempo, asina cu nan por aumenta nan oportunidad di haya un luga den e direccion di estudio cu nan realmente ta desea.
