Meneer Rensley Mathilda, Director:
- Cu hopi energia ta preparado pa e aña escolar nobo
ORANJESTAD (AAN)- Meneer Rensey Mathilda, Director di Stichting Educacion Profesional Basico San Nicolas (EPB-San Nicolas), cu hopi satisfaccion a comenta den entrevista cu Matutino DIARIO, cu aña escolar 2025-2026 a cera bunita.
“Danki Dios nos a cera cu un logro di 87% di e total di e alumnonan cu por a gradua. Nos ta hopi contento na esey y danki na e maestronan, na e mayornan, na e studiantenan y sigur na tur empresa cu a yuda pa nos por a logra un aña escolar exitoso, pasobra sin nan e lo a bira un poco fastioso en berdad”, meneer Mathilda a indica.
Director Mathilda a expresa cu aworaki nan ta na inicio pa cuminza e aña escolar nobo aki, y cu hopi energia nan ta preparando pa warda nan studiantenan un bez mas.
“E ultimo añanan manera tur scol ta pasando nos tin un baha di studiantenan. Aña pasa e cantidad a baha, dos aña pasa tambe, y e aña aki ta mustra cu ta bahando. Pero nos ta logrando e cantidad cu nos ta mira cu nos por carga, e ora ey”, e docente a subraya.
El a agrega cu constantemente tin cursonan nobo, manera e aña aki cu ICT, y Koki den un bachi nobo, gastheer y tur eseynan den e forma di creivo. Y e aña aki ta introduci un otro cu ta Logistica. “Esey ta un otro programa cu nos ta brinda nos comunidad, y seguramente e area di educacion profesional, unda cu e muchanan aki ta siña e parti di logistica”, meneer Marthina a señala.
El a splica tambe cu manera tur hende sa, e problema mundial aworaki ta e parti di logistica, unda mas bon bo sa di e sistema mas bon bo ta prepara tambe pa bo dushi tera, unda cu asina bo por traha riba bo retonan.
