Entrevista cu Tara van der Werk riba su campaña di concierntizacion

Miss Teen Aruba International yudando cu campaña pa proteccion di animal

ORANJESTAD (AAN): Siman ta habri cu un bunita informacion di un trabao bunita pa yuda concientiza comunidad riba cuido y derecho cu cachonan y pushi tin riba e isla.

   “Mi nomber ta Tara van der Werk y mi ta Miss Teen Aruba International, y e new Arubiano Brand Ambassador,” e Miss Teen a indica.

   Pa celebra e 15 aña di e marca local ARUBIANO Awareness brand, el a splica cu nan lo dedica un campaña di concientizacion pa proteccion, cuido y derecho di nos cacho y pushi na Aruba.

   “Hunto cu e marca Arubiano, mi lo traha duro pa yuda promove esaki, pa cambio pa tur nos animal nan, esun nan cu ta worde abusa, esun nan cu ta biba riba caya desde cu nan ta chikito of esun nan cu a worde bandona, y tambe esun nan cu ta biba den shelter y ta wardando un hende pa bin adopta nan.”

   Tara van der Werk a sigui bisa: “Mi amor pa animal a cuminsa for di chikito, pero no semper e amor tabata tey. Mi tabata tin miedo di cacho y pushi. Pero mi tata a trece 2 American Bulldog cas, y tiki tiki nos a crea un ‘’bond’’ inolvidabel. Di dia mi a descubri mi amor pa mi 2 American Bulldog nan, mi tabata sa mi kier haci un cambio pa e animal nan aki di Aruba, especialmente cacho y pushi. Mi kier uza mi plataforma como Miss Teen Aruba International pa trece e problema nan pa dilanti y haci mi best  pa yuda bin cu solucion y purba haci un diferencia cu ayudo di esan cu ta desea un cambio y kisas asta bini cu solucion con pa resolve algun di e problema nan.”

   Por ehempel, ora di violacion di e obligacion pa cuida e cacho segun articulo 2 di Ley di Cacho, e doño por haya un boet y e transaccion cu ta worde ofreci ta 750 te 1000 Florin; si tur hende cu tin un cacho adheri na e articulo aki caba, tur cacho na Aruba por gosa di bon cuido.

   Actualmente, Tara ta boluntario na Servicio Veterinario Aruba, pa asina por yuda cu tur e  animalnan y duna nan mas amor cuido y amor possible. Tara lo bishita  diferente scol pa duna mas informacion y tips pa Animal Rights Awareness, como parti di concientizaciom campaign hunto cu ARUBIANO.

   Tara, ta sumamente entusiasma cu e proyecto pa trece varios luna  di concientizacion tur siman, Animal Rights, Responsible Owner, Adopt-a-Pet, Spay, Neuter  y mas, y e temanan ta enfoca hopi riba e responsabilidad di e doño di cacho- pa evita tanto abuso y abandono.

   Tara a indica cu e ta spera di conta cu apoyo di henter comunidad Arubiano.  El a manda tambe un danki special na fundacion CCC, y tur esnan cu ta apoya nos cu e proyecto aki.