ORANJESTAD (AAN) — Den un entrevista cu DIARIO, Hubert Luis Tiel, ken dia 19 di augustus ultimo a cumpli 55 aña den e mundo di fotografia,
kiermen, el a cuminza cu solamente 11 aña di edad, ora su mama a regal’e un camara chikito. E ta corda cu e tempo ey tabata uza roll di 12 potret blanco cu preto.
Tiel a conta cu e idea tabata p’e mes saca potret di e muchanan rond di su cas cu ta bin anochi canta happy Birthday pero esey no tabata e caso.
Unabes cu el a haya e camara den su man, p’e tabata a placer, y un di e miho potretnan cu el a saca e tia ey tabata di su mama, for di rest tur loke tabata move rond: un cadushi, un parha, un pushi, y den un rato e roll di 12 a caba; el a haya zundra pasobra no tabata tin mas film p’e saca su fiesta.
“E tempo ey no tabata tin camera sofistica manera nos conoc’e awendia. Gewoon e cameranan chikito ey, no tabatin focus, ni nada. Loke bo ta haya eseyta bay” Hubert Tiel a conta nos.
“Mi a keda progresa un tiki mas den fotografia, mi tabata siña laba potret na Chonay Boekhoudt y haya les di black & white. Ora cu nos por a haya lift merdia tabata bay Simeon Antonio, unda Chonay Boekhoudt tabata tin su estudio, anto bo ta yuda, bo ta siña”, Hubert Tiel a menciona.
Cu su 18 aña el a cumpra oficialmente su prome camera cu si tabata un tiki mas sofistica; bo por a zoom, cambia lens, y haci algo mas. Esey tabata Pentax, nobo, nobo ora el a subi mercado. “Cu mi 19 aña mi a cumpra mi prome Nikon, y mi tin Nikon te awe”, Hubert Tiel a relata.
