Entrega di plakkaat na capitan di Oasis of the Seas

ORANJESTAD (AAN): Manera cu DIARIO a anuncia siman pasa caba, e barco crusero Oasis of the Seas ta uno cu a wordo construi na aña 2007 caba,

y su prome viahe inaugural tabata na December 2009.  Pues e tin 14 aña caba ta nabegando pa tur sorto di waf rond mundo.

   Pero nunca antes el a bishita Aruba, te Diaranson siman pasa dia 3 di Januari 2024.

   Mihor laat cu nunca, y na su yegada na waf di Playa, el a wordo saluda cu cañon di awa di e remolcadornan di Aruba Ports. 

   Despues tabatin un ceremonia abordo di e barco, unda funcionarionan di Aruba Tourism Authority, Aruba Ports Authority, Aduana, y agencia SEL Maduro & Sons tabata presente.  E barco a yega e dia ey cu 6.687 pasahero, y 2.079 tripulante.

   Durante ceremonia di entrega di plakkaat, Patrick Melchiors kende ta Destination Services Manager di ATA a presenta un obra di arte di Aruba na e capitan, na nomber di Ministerio di Turismo y ATA.  Tanto APA y tambe SEL Maduro & Sons a entrega plakkaat y a extende danki na e capitan y henter tripulacion.

   Oasis of the Seas tabata e prome barco di e clase Oasis opera door di Royal Caribbean International, ta renombra pa su atraccionnan renombra y inovativo. 

   E bishita na Oasis of the Seas no ta djis un indicacion cu nan ta aprecia e atraccion di Aruba como destinacion di crusero, y ta subraya e dedicacion di Royal Caribbean pa bin cu mihor experiencia crusero.