E hora di berdad ta bati na porta cu solicitud di trabou di partidonan
*Candidatonan no por tin strafkaart pero Miembro di Parlamento si!
*Mancha di discriminacion den e alma politico di Aruba den Reino!
ORANJESTAD(AAN)—Na luna di September 2024, Aruba a conoce e momento cu den Parlamento como representante di Rey, Gobernador Boekhoudt, a entrega na Parlamento di Aruba un resumen di gobernacion di Aruba.
Como Representante di Hefe di Estado di Reino, Gobernador di Aruba a honra e base di e sistema di Democracia Constitucional, den cual gobernacion di e pais Aruba ta wordo forma dor di Rey y e personanan cu Pueblo di Aruba eligi pa goberna e pais.
Durante eleccion Pueblo ta papia pa medio di partidonan politico, cu ta presenta nan candidatonan cu lo goberna e pais, si Pueblo entrega nan suficiente voto.
Parlamento cu ta e concepto maximo di loke ta deseo di un pais y partidonan politico mester duna contenido na cantidatonan cu ta honra deseo di Pueblo pa bienestar di Pueblo wordo sirbi dor di personanan cu partidonan ta brinda como candidato.
E representante di Pueblo mester representa e moral di Pueblo y esaki ta haci cu pa un partido presenta un persona como su candidato, e persona aki mester entrega prueba cu e no tin problema cu Husticia y cu e ta un persona cu por refleha e grado di decencia y bon comportacion cu ta ehemplar pa e pakete moral di e Arubiano.
Na e momentonan aki, tur persona cu partidonan politico pone riba nan lista como nan candidato, mester entrega nan “geloofsbrieven”, credencial na nan partido.
Ta partido inscribi oficialmente por participa na eleccion y presenta candidatonan cu mester por entrega prueba di nan bon conducta loke ta haci cu nan no tin strafkaart.
E ora di berdad a yega pa un situacion historico pa Aruba, cu a lucha y hasta a exigi su propio Ministerio Publico den negociacionnan pa Status Aparte, pa evita cu discriminacion por tuma lugar na Aruba.
Ley ta basa di gobernacion riba tur tereno na Aruba y Ley na nomber di Pueblo di Aruba ta wordo introduci dor di Parlamento di Aruba, cu a dicidi cu un persona cu wordo castiga na castigo di prison dor di Huez, no por presenta su mes como candidato pa drenta den Parlamento di Aruba.
Tur hende cu ta atende cu ley, ta conciente cu leynan ta wordo ahusta continuamente ora nota cu tin buraco.
Na inicio di Parlamento di Aruba, cu tabata e alma di Status Aparte, ley a elimina personanan cu segun Huez a comete un delito, for di personanan cu por representa Pueblo den Parlamento.
Na e momento, no a tene na consideracion, cu un Miembro di Parlamento lo a kibra su huramento tumando e Ser Supremo como su testigo, cu e lo honra bienestar di Aruba, loke ta nifica cu nunca e lo comete un acto ilegal, castigabel, contra e pais Aruba.
Huez den Prome Instancia a dicta cu Benny Sevinger, cu Mike Eman na eleccion pasa a uza pa crea historia den Reino Hulandes, cu un persona den prison ta wordo eligi como representante di Pueblo, ta subi lista di AVP.
E partido di Mike Eman, AVP, a core campaña pa Benny Sevinger haya suficiente voto personal pa e por a drenta Parlamento di Aruba como candidato di AVP y asina skirbi historia pa Aruba como e prome Miembro di Parlamento cu ta wordo paga dor di Pueblo pa representa e pais, tin un strafkaart, a wordo condena dor di Huez pa prison.
Awe Aruba ta completamente den gara di partidonan politico cu ta pidi Aruba sosten pa nan por participa na eleccion 2024.
E sistema politico di Aruba ta exigi pa Pueblo sostene partidonan politico cu mester di cierto cantidad di firma di Pueblo, pa nan por participa na eleccion cu e lista di candidato cu nan presente.
Benny Sevinger no por inscribi su mes como candidato ya cu e porta a wordo cera pa Benny cu un orden di Huez. Pero prome cu Benny Sevinger despedi, e ta miembro di Parlamento cu ta dicidi pa Aruba y ta goza di salario di Miembro di Parlamento y tur loke Aruba ta entrega su representantenan.
Un momento historico a bati na porta. Un Arubiano, cu no ta Miembro di Parlamento di Aruba, ta perde su trabou for di momento cu e bira acusado.
Na Aruba, mientras hobennan politico cu kier bay traha pa nan pais mester busca prueba cu nan no tin problema cu autoridad y no tin carchi di castigo ni prohibicion di Huez pa ta den Parlamento, pa nan por subi un lista.
Mientrastanto despues di eleccion ora un constelacion nobo sinta, Benny Sevinger ta bay cas despues cu AVP a permiti pa e keda cu su entrada di Pueblo y tur otro beneficio.
Democracia ta yora, ora e mira un tata di famia bay prison pasobra el a horta un pan pa su famia cu hamber, y asina no por participa riba un lista di partido pa e por drenta Parlamento, cu manera e acto oficial cu participacio di Gobernador a indica, ta e maximo representacion di Pueblo di Aruba!
