Entrante awe lo tin ehercicio internacional amfibico na Aruba

ORANJESTAD (AAN): Tene cuenta cu for di 19 te cu 26 di October, lo tin un training internacional andando na costa di Aruba.

   E ehercicio internacional aki yama ‘Très Kolos’, ta socede un biaha cada dos aña, y e biaha aki e ta den area y na costa di Aruba.

   Durante e periodo aki Militarnan Hulandes, Mericano y Frances lo participa na e ehercisio.  DIARIO a haya sa cu e aña aki Militarnan di Aruba tambe lo ta parti di e ehercisio aki.

   Très Kolos (tres color) desde 2010 ta conoci bao di e nomber aki. E tres colornan ta referí na e colornan di e bandera di e paisnan historico cu ta participa.

E ehercisio ta consistí di un parti di competencia di actividadnan Militar y un parti cu ehercisionan tactico. E parti competitivo ta consistí di caracteristicanan tal manera un marcha rapido, un careda di awa cu obstaculonan, un cruzada amfibico, tiramento, y asignacionnan di nabegacion.

   E parti tactico ta consistí di diferente ehercisio, durante cual ta practica un diversidad di scenarionan militar.

   Tur e actividadnan cu ta wordo haci durante e Très Kolos ta actividadnan particularmente desafiante. Den esakinan habilidadnan militar y físico ta aborda na gran medida, pa asina laga lo mihor sali bin ariba den e ekiponan den terminonan di deportivismo, cooperacion, integracion y competencia. Meta di e ehercisio ta pa consolida y desaroya aun mas, y sigui engrandece e relacionnan mutuo entre e diverso equiponan di forzanan arma. Esaki ta pa nan ta ainda mihor prepara pa e retonan cu Region Caribe ta trece cune.  Aki por pensa riba e.o. e yudanza di emergencia durante pasada di un horcan.