Entrante 1 di November Respaldo lo bay cera su seccion di PAAZ

Presidente di ABV, Gina Maduro a confirma

• Diesocho cliente afecta awor cu 'Verblijfsafdeling' di Respaldo ta cera
• Hopi di nan a haya espacio den SABA y otronan a bay cas di famia 

ORANJESTAD (AAN) – Manera ta conoci, PAAZ Afdeling cu antes tabata bao di Hospital, a bay riba su mes y a bira Fundacion Respaldo. Den entrevista cu Gina Maduro, presidente di sindicato ABV, el a splica tocante e situacion di crisis cu e Fundacion aki ta enfrentando.

   Maduro a menciona cu na 2020 a bin e recorte di 5.5% cu pa nan ta pisa hopi. Y los di esey, tabata tin un caso den Corte, cu na prome instancia nan a gana, pero despues den Corte de Apelacion, nan a perde, y nan a keda cu un debe di 1.8 miyon cu AZV, y nan tin un debe di cuido cu hospital tambe, di 2.1 miyon, pasobra nan tabata cay bao HOH. Ademas e tres tranche cu nan a haya, a tarda pa drenta. A pasa seis luna pa nan haya e prome tranche, na unda cu door di tanto retraso mester hasta cera un departamento cu yama “Verblijfsafdeling”, for di entrante 1 di November. E departamento aki tin 18 cliente cu practicamente a biba añanan den Respaldo (ex PAAZ). PAAZ a wordo funda na 1987 despues di Status Aparte. E caso di e personanan aki ta un mas un indicacion social, y aworaki ta bezig cu famia y cu curator pa wak con pa ubica nan.

   “Logicamente bo no por laga nan riba caya, pero poco, poco tan ta wordo re-ubica. Tin cu a bay SABA, otronan a bay cerca famia. Dus, nan ta bezig cu e parti aki y esey ta duna un besparing di 1.8 miyon pa Respaldo, vooral e momento di crisis cu nan tin”, Gina Maduro a señala.

El a agrega cu e trabao di ABV como sindicato, ta pa percura pa tur e trahadornan haya un overplaatsing, den e stichting.

E presidente di ABV a splica cu no ta solamente pa motibo financiero ta cera e departamento, sino pasobra ta depende di ki rechting nan kier bay. E caso di e 18 personanan aki ta un aspecto social, y tin e cuido basico y e cuido specializa, y Respaldo ta bay enfoca mas riba tereno di cuido specializa. Cuido basico ta bay bao stichting Hunto, y verslavingszorg. E ta kere cu nan final, nan tur mester bay traha hunto.

Encuanto e debe cu Respaldo tin cu AZV, Gina Maduro a comenta cu e partidonan ta na mesa pa yega na un acuerdo. E tin entendi cu AZV tin comprension pa e situacion pero e otro parti cu ta hospital mester yega na un betalingsregeling.