Prome Minister Evelyn-Wever Croes a anuncia
*No lo mester paga mas pa e remedinan riba e lista
ORANJESTAD (AAN): Manera DIARIO a trece dilanti diasabra, siman pasa Prome Minister Evelyn Wever-Croes, a duna di conoce cu Gobierno tabata reuniendo pa asina bin cu un solucion structural pa e asunto di remedinan den e Lista Positivo cu AZV no ta cubri mas desde 1 di April 2021.
No a tarda hopi y diabierna anochi durante un discurso nacional e mandatario a anuncia cu gobierno ta trahando duro riba e retonan cu tin den nan caminda. Un di nan ta e condicion cu Hulanda a pone cu mester corta 5 miyon florin pa luna den gastonan di AZV..
El a bisa cu Gobierno di Aruba no ta di acuerdo cu e condicion aki y pesey a institui un comision nacional di e sector medico pa nan bin cu proposicionnan pa Gobierno riba con por baha gastonan medico na un forma responsabel.
Segun e mandatario, mientras cu e comision aki ta deliberando, no ta cortando 5 miyon florin tur luna, pero un suma hopi mas abao. "Nos como gobierno a purba di tur forma pa convence Hulanda cu corta 5 miyon florin tur luna na gasto medico no ta posibel. Sinembargo, Hulanda ta keda para riba cu e condicion ta cu nos mester corta 5 miyon tur luna of 60 miyon pa aña sino Aruba no ta haya e sosten di likides pa paga otro gastonan manera cuido di salud, seguridad, enseñansa na Aruba of pa e subsidio di salario of FASE".
Pa sali di e 'impasse' aki a pidi un comision nacional pa bin cu proposicionnan y e proposicionnan aki gobierno lo ricibi nan hopi pronto, Wever-Croes a indica diabierna anochi.
Otro cambio ta e maneho di AZV cu desde 1 di April 2021 ta cobra pa cierto remedinan riba e asina yama 'Lista Positivo di Remedi' of 'Positieve Lijst'.
Gobierno a wordo acerca pa hopi hende cu no por paga pa e remedinan. Nan ta depende di bijstand, FASE of pension di biehes.
Prome Minister a anuncia cu diabierna Conseho di Minister a tuma e decision pa cambia e maneho aki bek y esaki ta nifica cu no mester paga mas pa e remedinan aki.
"Nos ta sinti cu e maneho aki no tabata suficientemente prepara y cu no a tene cuenta cu e impacto negativo riba hopi pashent cu no por a paga nan remedinan", a señala.
Gobierno a pidi AZV, hunto cu e comision cu ta aconseha gobierno riba remedinan, pa nan studia e maneho aki mihor y mientrastanto ta elimina e decision aki.
Entrante 1 di Mei 2021 e maneho di 'Lista Positivo di Remedi' ta keda elimina y e situacion ta keda mescos cu e tabata prome cu 1 di April (cu no mester paga pa e remedinan aki mas), e mandatario a remarca.
"Cu esaki nos ta trece bek trankilidad den nos comunidad, specialmente cerca esnan mas vulnerabel y asina nos ta sigui traha pa soluciona cada reto cu crusa nos caminda", Evelyn Wever-Croes a finalisa bisando.
