Entiero di Melvin A Tromp den forma di despedida di un gran luchado pa husticia social

ORANJESTAD (AAN): Awe Diahuebs lo tene e entiero di e conocido politico y miembro di Parlamento di Aruba, sr. Melvin A Tromp.

   Siman pasa dia 31 di januari, den ora di merdia a drenta e tristo noticia cu Melvin Tromp a fayece na Medellin, Colombia. E tabata malo pero a sa di tene esaki como un secreto pa mayoria di su amigonan y pa su famia.

   Diasabra cu a pasa e curpa di Melvin Tromp a bolbe Aruba y a worde ricibi door di su rumannan y amigonan di partido AVP.

   Pa e despedida y entiero di sr. Melvin A Tromp a traha un programa cu ta ensera entre otro un “reunion extra-ordinario” di partido AVP na Cas di Partido. Esaki lo tuma luga diaranson dia 8 di februari entre 7’or y 9’or di anochi. Den e sala grandi na Cas di Partido lo reuni pa rindi tributo na Melvin A Tromp pa su lucha pa husticia social na Aruba. Famia di Melvin A Tromp lo ta presente pa ricibi condolencia. Melvin mes no lo ta na Cas di Partido diaranson anochi. Entre otro un di e yiunan di Melvin A Tromp y algun amigo lo hiba palabra.        

   Dia di entiero: E entiero di Melvin A Tromp lo tuma luga awe Diahuebs dia 9 di februari. Lo sali di San Nicolas pa bini Playa pa para un rato dilanti di edificio di Parlamento di Aruba. Eynan miembronan di Parlamento lo para pa dispidi y lo pone un krans den e cherche. Despues lo core pa bay para na Cas di Partido den Rancho. Eynan lo para pa mas o menos 30 minuut pa duna miembronan di Partido AVP e oportunidad pa dispidi di nan amigo y colega Melvin A Tromp y pa duna e famia condolencia.

   Lo bolbe bay San Nicolas pa bay para den Misa Santa Theresita, caminda lo tene e ceremonia di misa y accepta condolencia. Finalmente lo hiba Melvin A Tromp pa santana Catolico den Zeewijk. Despues di entiero y un dia largo, no lo ricibi condolencia na cas.

   Famia di Melvin A Tromp kier gradici tur hende cu di un forma of otro a yuda consola y yuda nan den e tristeza profundo aki.