Sabine De Groot, Intendente pa EPE:
ORANJESTAD (AAN) – Señora Sabine De Groot, Intendente pa Enseñanza pa Empleo (EPE), den entrevista cu DIARIO a duna di conoce cu EPE semper a gusta su manera presencial di duna les, na un forma accesible pa tur hende, y no tin pensa di cuminza duna cursonan digital ainda.
“Nos ta mira mas cu nos poblacion ta gusta e contacto cu docente y compañeronan di klas, mas cu solamente bay riba digital. Den oficina si nos ta bezig cu digitalizacion, y esey ta hopi importante pa hende cuminza mira nos facebook page y tambe check nos website, unda tin informacion tocante tur e cursonan”, De Groot a señala.
El a agrega cu les di computer EPE ta keda duna, pero riba nivel basico. Esaki pasobra ainda tin hende cu no ta haya chens pa sigui cu nan desaroyo digital.
Sabine De Groot a indica tambe cu e curso di Nabegacion tin dos aña cu a para completo, y ningun hende por a saca su vaarbewijs. Den colaboracion y cooperacion cu Directie Scheepvaart y hunto cu señor Boujon, Havenmeester, a logra cu e docentenan, pa skirbi material nobo na Papiamento, tocante tur e reglanan y leynan di lama. “E ta manera pa saca bo rijbewijs di auto, pasa teoria, y despues bo ta sigui un examen di practica. Mi sa cu tin hopi hende preocupa pasobra nan no tin boto ainda, of nan mester fia boto, y nos ta compronde esey. Pero despues ora bo haal bo teoria bo tin un aña pa bin cu boto cu ta alomenos 17 pia, pa asina bo por pasa bo examen di practica”, Sabine De Groot a comenta.
El a agrega cu e curso pa haya e licencia pa nabega, e instruccion, material di les, ta na Papiamento, pero e docentenan ta papia Hulandes, Ingles y Spaño tambe.
E ta un curso pa cual tin hopi demanda, y mescos cu tur otro curso, e lo cuminza dia 17 di April aki, y ora ta trata di un curso cortico manera esaki di vaarbewijs, EPE ta pone un curso nobo su tras.
Interesadonan pa cualkier di e cursonan por pasa na bali for di aworaki pa inscribi. EPE no ta tuma placa cash eynan pero e tin su swipe mashin. Aki dos siman nan ta keda cla cu remodelacion y ora nan ta keda cla cu tur esaki, lo sondea oportunidad pa bay pariba (San Nicolas).
