Enfoque awe riba Dia Mundial di Concientizacion pa Autismo

ORANJESTAD (AAN): Oficialmente e yama ‘World Autism Awareness Day’, y ta wordo reconoci internacionalmente riba 2 di April cada aña. 

Ta encurasha miembronan di Nacionnan Uni pa tuma medida pa crea mas concientizacion riba hendenan cu tin e spectrum Autistico, incluyendo Autismo y Sindrome di Asperger rond mundo.

    Carolina Span kende ta Presidente di Fundacion Autismo a mustra cu Aruba tambe ta cla pa observa esaki.

   El a splica cu cada aña ta escoge un tema pa asina concientiza riba un topico cu ta relata na problemanan, y aspectonan cu falta den bista di comunidad pa cu Autismo.  Nacionnan Uni a dicidi cu pa 2022 a escoge pa enfoca riba e topico di ‘Inclusion na Scol’ of “Educacion di calidad inclusivo”, cu ta un tema cu pa como 3 aña caba Fundacion local ta enfocando riba esaki y papia riba dje, pasobra nan ta mira e problematica aki ta sigui crece.

   Pakico e ta hopi importante?  Pasobra ta mira den comunidad di comunidad autista tin como 44% cu por funciona den un setting regular di trabao y educacion y comunidad.  Pero loke ta pasa ta cu si acaso no tin e hermentnan y e conocemento pa reconoce esaki y brinda nan cu e sosten cu mester, e lo no socede.

   “Mi ta hopi contento di mira cu Nacionnan Uni a haci esaki topico oficial, y sigur na Aruba nos tambe lo pone atencion na esaki,” Carolina Span a bisa.

   Awe Diasabra anochi trempan, nan lo ta na Edificio di Gobierno ora lo cende e luznan blauw como un forma pa yuda concientiza comunidad riba e Dia di Autismo.  Segun Carolina Span, nan lo bay papia un rato tambe eynan riba e topico aki, y tambe di kico nan kier mira mas di dje.

   Fundacion Autismo ta hopi contento cu mas y mas hendenan ta compronde kico Autismo ta, y cu hendenan ta mas abierto pa e realidad cu nan por ta parti di comunidad den tur forma, incluyendo educacion y trabao.  Pero hopi ta mustra cu nan mester di herment pa esey, y ta pidi yudanza di e Fundacion pa logra esey.

   Pesey ta enfocando hopi pa organiza Workshop y tene Lectura pa por brinda e hermentnan ey.  Aña pasa a enfoca caba riba e parti di trabao, y e biaha aki ta bay bek na educacion, pasobra nan kier reforza esaki pa educadornan.  Y awor na 2022 ta hopi contento, pasobra den cuadro di inclusion a inclui dos otro organizacion local cu ta FAVI y FEPO pa uni cu nan, pasobra nan kier pa e ta algo inclusivo unda personanan cu diferente habilidad ta wordo inclui den comunidad na diferente forma.

   Fundacion Autismo Aruba ta invita comunidad pa pasa awenochi trempan dilanti Oficina di Gobierno pa mira e “Light It Up Blue”.  Tambe check pa e lecturanan cu lo ser duna, cuminzando Dialuna 4 di April 2022 cu “Señalnan Trempan”.  Esaki lo tuma lugar na Prinses Amalia Basisschool.  Pa 5:30 pm lo ta un lectura special dirigi na educadornan.  Pa 7:15 pm ta special pa Mayor y Famianan.  Asina bo ta haya informacion ki ora bo t a cuminza ripara cu un persona ta autista, y kico bo por spera, y unda bo por bay ora bo realiza esaki.

   E lectura tey tambe pa educadornan sa con pa anda cu e mayornan, unda pa meld e muchanan.  Lo papia di inclusion na scol.  Lo tin docentenan cu ta brinda un manual cu a wordo traha riba dje, unda por haci uso di hermentnan chikito den klas pa haci esaki mas ameno pa personanan cu necesidad special.  Pero tambe inclusion pa mayor y famianan, pa nan haya herment pa sigui lucha pa cu inclusion di nan yiunan.