ORANJESTAD (AAN) — Parlamentario Endy Croes, di fraccion di MEP, a duna di conoce cu el a tuma nota di un sentencia di un caso contra Ernst & Young,
cu tin rond di 14 aña andando, y esey no a cay na su fabor. Esaki tin di haber cu el a wordo retira di Lotto, y ora el a gana e caso den corte di apelacion y casacion e mester a haya daño y perhuicio, pero corte no a bay di acuerdo cu e suma. Endy Croes ta duna detaye con esaki a bay, y e, cu su abogadonan, lo bolbe apela y bay casacion.
“E caso aki ta encera cu na aña 2010 mi a wordo kita for di Lotto y a tuma hopi aña pa cana un trayecto pa lanta un caso contra Ernst & Young, cu ta esun cu a skirbi e rapport den e caso aki.
E caso aki nos a gan’e den caso di apelacion, y den Casacion.
Den casacion nan a destrui e rapport ey, pasobra basa riba e rapport ey e Huez, na 2010 a tuma e decision. Mi ta corda cu den e ultimo veredicto di casacion nan a bisa cu tin daño si, pero e ta bira un otro caso pa bo bay claim un tipo di schade. Dus e caso ey nos a cuminza cu ne, un aña y mey pasa, segun mi, na final di dia cu un claim riba Ernst & Young. Ernst & Young a hinca Lotto den vrijwaring bek, esey ta algo con nan a atende cu esey huridicamente”, Parlamentario Croes a splica, y a sigui bisa cu riba e caso aki a caba di bin un sentencia, cu el a spera hay’e na Augustus mas of menos, pero el a wordo sorprendi cu a hay’e caba y e no por a pasa riba dje completo pasobra e tabata hopi ocupa te anochi cu otro actividadnan.
Su mainta el a combersa di dje cu un abogado y e ta sigur cu lo bay corte di apelacion, cana e camindanan legal cu tin, despues casacion, haci e trayecto un tiki mas largo.
“Algo si, cu mi ta lamenta; cu tur respet, e mesun huez cu a atende e caso na 2010 e dia cu nan a move mi for di trabao, a baha cu pensioen despues, a keda bin bek Aruba riba contract, anto den e caso di schade, e mes a tuma e caso, e mes a tuma un decision. Nos ta haya esaki toch, un tiki conflictivo, mi ta bisa hopi rustig pero nos lo atende esaki cu abogadonan, nos lo bay den apelacion y nos lo cana e camindanan cu ley ta duna tur ciudadano y contra- partidonan pa cana. Esey no ta algo cu di awe ta canando, tin 14 aña cu ta andando y si cana un aña y mey of dos aña mas, ta ok”, Parlamentario Endy Croes a señala.
