Presidente di Parlamento Marlon Sneek:
ORANJESTAD (AAN) – Den entrevista cu DIARIO, Presidente di Parlamento, señor Marlon Sneek a elabora riba e Rijkswet, cual a wordo trata Diabierna 4 di Juli, mainta.
“Mi a pone un trayecto con nos ta bay atende cu e Rijkswet, y Diabierna pa 12 or di merdia nos tabata tin un ‘technical meeting’. Nos a haya e tres ambtenaarnan cu a wordo apunta for di Gobierno anterior pa negocia. Gobierno nobo a tene e mesun hendenan den e team negociado, pa no tin cambio, pa no tin problema”, Presidente di Parlamento a duna di conoce.
Kiermen e mesun personanan a keda como team negociado, na nivel di ambtenaar, y ayera nan a bin duna Parlamento e presentacion di kico nan a negocia, kico ta e cosnan cu a keda, kico nan a logra cambia den e totalidad, pa despues haya e parti unda Minister mester a atende riba nivel di Gobierno. “Kiermen, di minister pa minister, di Gobierno di Aruba pa Gobierno di Hulanda, pero mirando cu Gobierno di Hulanda a cay, aworaki aki nos por a tuma nota cu tin Secretario di Estado nobo, cu a huramenta. Dus, e parti ey mester tuma lugar pa e ora ey e Minister bin Parlamento atrobe den un reunion publico, pa duna informacion, di con e Rijkswet”, Sneek a señala.
El a agrega cu despues cu e Minister bin duna informacion, nan tin un reunion publico caminda ta bay dicidi riba e Rijkswet aki.
“Parlamento di Aruba tambe tin cu vota y bisa si nan ta di acuerdo cu e contenido aki. Despues cu e bay Hulanda, ainda Hulanda por bisa cu nan kier agrega algo mas. Parlamento di Aruba por manda delegadonan aya, na Hulanda, pa si nan ta bisa cu toch mester tin un amienda pa haci cambio den e ley, nan tin e chens ainda pa traha e amienda ey y laga entregue door di e Parlamentarionan di Hulanda, Tweede Kamer, pasobra e Parlamento di Aruba mes no ta participa den e votacion, pero si den e debate”, Presidente di Parlamento Marlon Sneek a splica.
“Kiermen bo por trece bo preocupacionnan pa e Parlamentarionan cu ta den debate y esnan cu ta bay vota, tene cuenta cu locual bo ta trece dilanti. Y esaki, e delegacion aki, por wordo conforma door di esnan cu no solamente ta representa Gobierno, pero oposicion tambe”, Sneek a agrega.
El a sigui splica cu si oposicion ta bisa cu nan no ta di acuerdo cu ne, cu e ta haya cu falta e punto ABC, pero, hipoteticamente, e mayoria bisa cu ta di acuerdo, ainda nan tin chens di bay den e debate oficial na Hulanda, y eynan ainda nan por entrega nan amienda pa haci cambio den e ley.
“Kiermen, e tin un trayecto ainda pa cana, tin espacio na unda Parlamento den su totalidad y e diferente fraccionnan ta haya oportunidad ainda pa tin nan opinion den e totalidad, pa por yega na final di e ley”, Presidente di Parlamento Marlon Sneek a relata.
