Encuestadornan ta cla pa cuminza cu Steps 2023

ORANJESTAD (AAN): Dentro di poco ta bay cuminza cu e encuestanan di Steps 2023, unda cu encuestadornan lo pasa na casnan di Aruba pa haya informacion riba e estado di salud di e ciudadanonan di e isla.

Di cada cas lo selecta 1 persona, unda cu lo haci diferente pregunta riba salud, mientras cu lo midi tambe presion, sucu etc.

E encuestadornan a haya un training special pa esaki y esey a culmina Diahuebs.

Durante un entrevista cu Iraida Thijsen, un di e encuestadornan cu ta bay ta activo, el a splica cu e 3 dianan di training di Steps tabata dianan hopi interactivo, unda cu tur hende a siña hopi.

“Nos a haya hopi tips riba con no por acerca hende y nos a haci hopi pregunta”.

Ta algo hopi importante y hopi util pa Aruba, pa nos por haya e data pa sigui traha riba salud di Aruba.

Pesey mi ta pidi pueblo di Aruba pa habri porta pa nos, pasobra nos tin hopi entusiasmo pa haci esaki y colecta e data, pa entre otro Gobierno y DVG traha un maneho pa mehora salud di nos hendenan, segun Thijsen, kende ta un nutricionista/dietista cu ta traha na IBiSA.

El a bisa cu e ta kere den informacion di salud y pa e motibo ey e ta sinti e necesidad di haya mas informacion di salud, pa por duna informacion mas directo na pueblo di Aruba.

E curso a wordo duna pa dos persona di Pan American Health Organization (PAHO).

“E training tabata hopi bon y mi ta hopi convenci cu nos tur por haci un bon trabao den e encuesta cu lo cuminza Diasabra dia 4 di Maart”, segun Thijsen kende a indica cu en total tin 20 encuestador y 5 reserva.