Señora Seraida Pemberton-Leonard di Stichting Reclassering:
ORANJESTAD (AAN): Siman pasa, un grupo di profesional di Aruba a reuni na Corsou cu coleganan di Corsou, Bonaire y Sint Maarten pa comparti experiencia y delibera riba e desafionan cu hobennan di e diferente islanan ta enfrentando. Señora Seraida Pemberton-Leonard di Stichting Reclassering a enfatisa e importancia di e encuentro, cu tin como meta fortalece colaboracion regional y intercambia conocemento tocante metodonan efectivo pa guia y sostene hobennan.
Segun Pemberton-Leonard, durante e diferente sesionnan, cada pais a presenta e proyectonan y iniciativanan cu nan ta implementando pa atende e necesidadnan specifico di nan comunidad. Esaki a crea un espacio pa profesionalnan por siña di otro y evalua con cierto strategianan por wordo adapta nan nan paisnan.
Aruba, por ehempel, ta concentra su esfuersonan riba e problematica di gangnan hubenil y e desaroyo di programanan cu por preveni participacion di hoben den actividadnan criminal. Durante e reunion, profesionalnan a comparti experiencia y resultado di e diferente metodonan cu ta wordo aplica den nan pais.
Sint Maarten, na otro banda, ta enfoca riba violencia entre hoben. Debi na e impacto grandi cu esaki tin riba nan comunidad, nan a desaroya un proyecto integral den cual diferente organizacion y instancianan gubernamental y social ta traha hunto pa atende e problematica for di varios angulo.
Na Corsou, e enfoke principal ta riba e influencia di medianan social y plataforma online. Segun e profesionalnan, hopi conflicto y acto di violencia no ta surgi di un momento pa otro, sino cu nan ta desaroya gradualmente door di mensahenan, canticanan, videonan y otro contenido digital.
Bonaire, di su banda, ta pone enfasis no solamente riba preveni comportacion negativo, sino tambe riba crea oportunidadnan y perspectivanan positivo pa futuro di hobennan, fomentando desaroyo personal, educacion y participacion activo den sociedad.
“Tin diferente manera pa deal cu cada isla ta implementando, y e idea principal ta pa siña di otro y adapta e metodonan cu ya a mustra resultado positivo, sin mester inventa algo otro,” Pemberton-Leonard a declara.
El a agrega cu, aunke cada isla ya a cuminsa implementa e proyectonan, tur ta enfrenta retonan similar, manera limitacionnan financiero y falta di personal specialisa. Segun e, pa logra resultado duradero ta esencial pa sigui inverti den programanan cu ta brinda sosten y guia efectivo na e hobennan cu mas mester esaki.
