Mundo ta vigila impacto vacuna y sistemanan cu ta desaroya - Miedo pa infeccion na 2020 a crea estado di alerta mas grandi cu na 2021 - Vacuna ta haya un importancia mas grandi den un mundo cu kier ta normal
ORANJESTAD(AAN)- Un luna di gran responsabilidad pa tur dirigente gubernamental y instancianan oficial cu ta traha cu Covid-19 a haci su entrada cu Augustus 2021.
“Tin diferencianan grandi entre e dos temporadanan 2020 y 2021. Di un banda na 2020 Aruba ainda no tabata conoce ningun tipo di proteccion contra Covid-19 mientras cu na 2021 ciudadanonan a haya oportunidad pa vacuna y asina proteha nan mes contra e malesa. Di otro banda ta nota con den publico tin un anhelo extraordinario pa bolbe na un normal, cu no ta existi actualmente.”
Esaki ta informacion cu DIARIO a ricibi na entrada di Augustus cu ta e luna cu ta cuminsa duna mas resultado pa e temporada di horcan.
Na 2020, publico tabata mas pendiente di loke por pasa ora e pandemia topa cu e entrada di e temporada di horcan, cu na forma directo y indirecto por tin un impacto mas grandi riba problemanan cu e pandemia ta provoca.
“Generalmente rond mundo liber, cu a haya oportunidad di vacuna, hende a cuminsa asumi un actitud menos tenso enfrente Covid-19. Sinembargo, no por kita bista ainda for di e problema cu e malesa ta representa, cu no solamente ta relaciona cu variantenan nobo,” informantenan a indica.
Nan a mustra cu hopi hende no ta consciente cu ainda mundo ta acumula informacion di Covid-19. Cuanto tempo realmente un vacuna ta sigui proteha, ta uno di e preguntanan cu ainda no por haya contesta concreto.
Hecho ta keda cu e grupo mas grandi di casonan nobo y sigur e casonan mas serio, ta hende cu no a vacuna. E grado di proteccion ta wordo midi continuamente dor di e cientificonan mientras e proceso di vacunacion ta sigui.
Pues na 2021 hende a vacuna, pero na 2021 hende aparentemente kier bandona e estado di alerta cu mester mantene cu e malesa. Na 2020 no solamente distancia social y mask tabata wordo mihor observa cu na 2021.
Mas hende ta biaha cu na 2020 tabata e caso mientras na cantidad di pais medidanan ta bolbe wordo tuma pa evita cu e virus ta haci su entrada.
Cu Augustus e region di Caribe mester tene cuenta cu situacionnan di emergencia cu e temporada di horcan lo produci hasta si no tin alarma pa un tormenta of horcan den vecindario directo di Aruba.
Mester prepara pa inundacionnan di sitionan di costumber. Mester prepara pa e temporada cu ta nifica cu mester percura pa tin un cantidad di mask y tambe prepara pa productonan pa sigura higiena den caso cu situacionnan cu no ta directamente di tormenta pero si di molester serio di awa presenta.
Informantenan a splica DIARIO cu durante e pandemia Covid-19 e situacion social di hopi hende a bay atras loke ta haci cu hende ta evita gasto cu por evita.
Na momento cu temporada di horcan a yega, mester gasta placa na prome luga na articulonan necesario pa higiena personal. Famia mester papia atrobe riba e forma pa yega hospital den caso cu un miembro di famia mester di oxigeno debi na contagio cu Covid-19.
“No ta un asunto di crea panico pero cantidad di casonan ta subi atrobe na Aruba y na hopi otro pais debi na e hecho, cu hende a bira menos atento y pendiente enfrente e riesgo di Covid-19,” informantenan a indica.
Awor mester tene na consideracion cu condicionnan di tempo por influencia pasonan cu mester tuma den caso di un emergencia. DIARIO lo sigui informa Aruba debidamente den un realidad sumamente peligroso, cu ta wordo crea dor di forma cu hende kier biba cu un normal cu no ta existi.
