Esun cu a tira riba Peter R. de Vries - ORANJESTAD (AAN): Te cu Diahuebs atardi laat, e situacion di e periodista tira na Hulanda, ta critico den Hospital.
E intento riba bida di e periodista Peter R. de Vries a haya un toque local, ora cu prensa Hulandes a cuminza indica cu e sospechoso principal di e atake violento cu tiro riba e famoso personahe ta procedente di Antiyas. Despues nan a pin-point esaki di ta un Arubiano.
Sinembargo esnan cu conoce e rapper Delano G. di cerca, sa cu e persona aki no ta Arubiano! Y tur cos ta mustra cu e no ta Antiyano tampoco.
E rapper Delano ta naci na Hulanda mes. Su mama ta Hindu, y su tata biologico ta un homber di Suriname. Pero cos no a bay bon cu e pareha ey.
Despues ora cu Delano tabata chikito, e mama a conoce un homber procedente di Aruba, y el a casa cune. E homber Arubiano di fam Geerman a dicidi na duna e mucha Delano su fam. Di e forma ey el a bira Delano Geerman.
Esey ta unico contacto cu e tin cu Aruba! Siendo cu su sanger no ta Antiyano y tampoco Arubiano.
Delano Geerman di Rotterdam tin 21 aña di edad. E siman aki caba Polis y Recherche a tene un razzia na su cas na Tiel, unda a confisca un cantidad di material eynan pa asina yuda nan den e investigacion.
Pero prensa Hulandes no a preocupa pa check esey mas profundo, y awor ta keda insisti cu un rapper cu papel di conducta hopi mancha mes y “procedente di Aruba” a bin purba caba cu bida di Peter R. de Vries.
Ta danki na hopi testigo cu a mira con e persona a huy, y danki na sistema di Security Camera tur caminda, autoridad a mira con el a logra huy den un vehiculo Renault color silver. Di e forma ey autoridad a cuminza busca rond y a bin haye ta tratando na huy for di Amsterdam.
Mientras tanto e victima Peter R. de Vries di 64 aña ta den mesun condicion interna na Hospital. Su condicion medico ta secreto, pero famianan mes a bisa cu tin hopi incertidumbre pa cu e futuro di e persona aki, di cual e intento riba dje a pasa rond mundo.
