En conexion cu e variante 'omicron' ta cera frontera pa bishitantenan di paisnan na Africa

Gobierno di Aruba y Crisis Team a anuncia medidanan: "Variante nobo ta motibo di preocupacion, pero no di panico"

ORANJESTAD (AAN): Dialuna atardi, Gobierno di Aruba hunto cu Crisis Team a tene un rueda di prensa pa asina haci algun anuncio importante den cuadro di e maneho di Covid-19.

Prome Minister Evelyn Wever-Croes a laga sa cu tin preocupacion cu e situacion na Hulanda relaciona cu e presencia di e variante nobo 'omicron'.

Na Hulanda tin hopi caso y nan ta aumenta hopi lihe. Eynan ta tumando hopi medida. Internacionalmente ta mirando cu tambe tin e variante nobo di 'omicron' cu a cuminsa na e paisnan di Zuid Africa.

Na Aruba ta siguiendo e desaroyo aki y pesey ta anuncia e medidanan cu ta bay tuma pa mitiga cualkier riesgo cu por core pa loke ta e variante aki di Africa, con lo cera e frontera pa cu esaki y pa loke ta Hulanda cu ta bay bin medidanan mas stricto ora cu cuminsa haya bishitantenan for di Hulanda den e siguiente luna, e mandatario a splica.

Esaki ta nifica cu pa loke ta frontera, en conexion cu e variante 'omicron' ta cera frontera pa bishitantenan di paisnan na Africa mientras ta sigui e desaroyonan di cerca.

E paisnan aki ta: Zuid Africa, Zimbabwe, Namibia, Lesotho, Mozambique, Eswatini y Botswana.

 "Na e momentonan aki nos tin cu proteha Aruba", a remarca.

Aunke Aruba no ta haya hopi bishita di Sudafrica, e decision aki no lo tin un impacto hopi grandi. Aruba ta haya hopi bishita di Hulanda y pesey mester tuma extra medida, Wever-Croes a expresa.

E di dos aspecto cu tin gobierno di Aruba y Crisis Team preocupa ta localmente. Ta drentando fin di aña cual ta un temporada unda tur hende sa lubida di cuida nan mes. Por wak kico a pasa den e di tres ola cu a cuminsa na December y a tarda casi te na Juni pa por a domin'e completamente .

Fin di aña ta custumbra di celebra, ta mas cerca di otro y cuida un poco menos. No kier cay den un ripiticion di aña pasa, Premier Wever-Croes a remarca.

"Nos no kier haya un situacion den cual Aruba mester bay bek den lockdown. Esey nos kier purba evita a toda costa", a bisa. Mester agrega cu e periodo aki di high-season ta un periodo prometedor pa hopi hende por recupera poco forsa pa por sigui durante e resto di aña.    

   E mandatario a subraya cu aworaki ta importante pa no bay den panico. E noticianan di e variante nobo ta causando un cierto grado di panico y e no ta kere cu esaki ta motibo pa panico. "Esaki ta motibo di preocupacion si, pero no di panico. Pakico no? Pasobra nos sa kico nos mester haci".

Pa awor no ta bay tuma mas medida interno na Aruba. Ta continua cu e medidanan cu tin caba manera orario di ciere, uzo di tapaboca obligatorio, reglanan di higiena, hand sanitizer den tur establecimento comercial, tene distancia y si tin sintoma pa bay test inmediatamente.

Mester sigui cuida y sigui promove e vacunacion, Minister Presidente Wever-Croes a declara.