Empresario a muri aplasta door di 16.000 wiel di keshi Grana Padano

BERGAMO: Na e ciudad di Bergamo, den e region di Lombardia na Italia, un empresario Italiano a fayece debi cu rekinan cu como 25.000 wiel di keshi tipo Grana Padano a basha bin abao.

  E rekinan di hero cu tin e wielnan poni riba otro, a basha den otro y a aplasta Giacomo Chiapparin di 74 aña di edad.  Giacomo a drenta e edificio unda e keshinan ta warda pa nan haya mas edad, pa asina check e robot automatico cu ta wordo usa pa limpia e wielnan di keshi aki.  Den e edificio tin 10 rij di reki cu aproximadamente 1.600 keshi den cada rij.

   Autoridadnan a describi e colapso como un “efecto di domino”, despues cu un solo reki di 30 pia halto cu tin e wielnan aki a kibra bin abao.  Cada wiel tin peso di 20 kilo.  A dura mas di 11 ora prome cu nan por a haya e curpa di Giacomo, despues cu Polis Carabineri, Cuerpo di Bombero, y Ambulans a wordo yama pa bin eynan.

   “Ora nos a yega aki, henter e deposito tabata yena cu keshi benta riba otro.  Nos mester a yama e unidad cu ta specializa den Search & Rescue di hende bao di un derumbe cu tin experiencia ora di temblor pisa.” Nan a dura oranan largo ta move e wielnan cu man, uno pa uno, y asina a bin haya e curpa te ora cu solo a sali bek caba. E amigo y bisiña di Giacomo, esta Bortolo Ghislotti, a bisa cu e mashin automatico a manda un alarm pa un fayo.  Y ora cu e homber di 74 aña a restart esaki, tur cos a cay riba dje.  Nan ta yama su morto un “tragedia inexplicable”.

   E fabrica a wordo funda den decada di 1970 y ta produci 15.000 wiel di keshi Grana Padano cada aña.  Famia di Giacomo ta biba y traha den e fabrica.  Ayera Diahuebs su entiero a tuma lugar.