ORANJESTAD (AAN): Gobierno ta preparando pa paga vakantieuitkering completo na Juni 2023. Esaki lo nifica, cu empleadonan publico lo ripara e siman aki un cambio den salario netto. E motibo cu salario netto lo ta menos, ta debi cu na aña 2022 no a tene cuenta cu e aña aki lo paga 100% di uitkeringen cu tabata 50% prome. Y door esey lo retene e reservanan di Januari 2023 te cu Mei 2023. Pues e netto lo ta menos pa
e siguiente 5 luna
Den cuadro di e intencion di Gobierno di Aruba pa paga e vakantieuitkering 2023 na empleadonan publico completo e aña aki, preparacionan a cuminsa. Ta paga esaki na juni 2023 y e placa ta reserva caba pa esey.
Pa empleadonan publico esaki kiermen cu pa por paga e vakantieuitkering “bruto” na Juni, manera tabata costumber, e empleado publico ta paga e loonbelasting adelanta reparti riba e cantidad di lunanan cu tin. Asina e empleado ta paga tur luna un poco mas loonbelasting pero ta haya e vakantieuitkering completo den su man sin mester paga loonbelasting riba dje. Asina el a tuma luga semper.
Preparacionnan encuanto eliminacion completo di e recorte ariba salario di empleadonan publico 20 januari 2023: Gobierno di Aruba ta den e ultimo fase pa por logra elimina e recorte di 12,6% ariba e salario di e empleadonan publico.
Anticipando ariba e decision di Conseho di Minister di Reino, Gobierno a cuminsa haci e preparacionnan necesario pa por elimina e recorte completamente. Manera ta conoci, e tarifa di loonbelasting y inkomstenbelasting tambe a wordo ahusta entrante 1 januari 2023. Ambos cambio lo wordo refleha pa prome biaha den e pago di e salario di januari 2023.
Pa e motibo aki Gobierno a traha e comunicado aki pa informa su empleadonan cu e cambionan lo afecta nan salario netto y pa splica dicon e lo afecta nan salario netto. E salario netto ta e salario total kitando tur e primanan social (AZV y AOV/AWW), loonbelasting y otro deduccionnan aplicabel. Mas facil splica, e salario netto ta locual e empleado publico ta ricibi ariba su cuenta di banco.
Anticipando eliminacion completo di e recorte ariba salario entrante 1 januari 2023: Manera ta conoci, entrante 1 juli 2022 Gobierno a elimina un parti (5%) di e recorte di 12,6% ariba e salario di empleadonan publico. E eliminacion di e recorte aki a causa cu e salario bruto di tur empleado publico a wordo ahusta.
Locual no a wordo elimina den 2022 ta e recortenan ariba e vakantie-uitkering, e toeslag cu ta wordo paga den luna di augustus (reparatietoeslag) y tampoco esun cu ta wordo paga den luna di november (najaarstoeslag). Manera menciona anteriormente, Gobierno ta den e fase final di por logra elimina e recortenan aki entrante 1 januari 2023. Unabes cu esakinan wordo elimina, e empleadonan publico lo cobra nan vakantie-uitkering, reparatietoeslag y najaarstoeslag completo. Anticipando ariba e eliminacion completo di e recorte ariba salario, Gobierno a cuminsa ahusta e reservation di e vakantie-uitkering, reparatietoeslag y najaarstoeslag den e luna di januari 2023.
Reservacion ta nifica cu e suma total cu lo mester wordo retene pa loonbelasting y primanan social ariba esakinan, lo wordo parti y retene tur luna pa asina por paga e vakantie-uitkering, reparatietoeslag y najaarstoeslag 'clean' den e luna cu nan ta wordo paga. Door di haci esaki e loonbelasting y primanan social cu mester wordo retene, no ta wordo kita den un solo biaha den e luna di pago. Particularmente e reservacion di vakantie-uitkering ta importante pa menciona, pasobra e reservacion di vakantie-uitkering conforme ley ta varia di un ana calendario. E reservacion di e reparatietoeslag y najaarstoeslag ta di januari pa december di e mesun aña (segun kalender).
Reservacion di vakantie-uitkering lo afecta e salario netto: E reservacion di e vakantie-uitkering ta for di juni di e aria prome cu pago te cu mei di e aria cu lo paga e vakantie-uitkering. Durante e lunanan aki ta parti e loonbelasting y primanan social necesario pa asina por paga e vakantie-uitkering 'clean' den e luna di juni. Pa e pago di vakantie-uitkering 2023, e periodo di reservacion ta core di 1 juni 2022 te cu 31 mei 2023.
Den e caso di e vakantie-uitkering 2023 mester menciona dos punto importante cu lo afecta nos salario netto den e periodo di januari 2023 te cu mei 2023.
(1) Mester 'haal in' e 50% di reservacion over e lunanan di Juni 2022 te cu December 2022: E reservacion di e vakantie-uitkering entre e luna di juni 2022 te cu december 2022 tabata basa ariba 50%. E tempo ey ainda e recorte ariba e vakantie-uitkering tabata vigente. Anticipando cu e recorte ariba e vakantie-uitkering lo termina entrante 1 januari 2023, lo mester reserva extra entre e luna di januari 2023 te cu e luna di mei 2023. Esaki ta necesario pa asina cubri e otro mitar cu no a logra reserva di e lunanan di juni 2022 te cu december 2022.
(2) Entrante Januari 2023 lo reserva bek 100% di e vakantie-uitkering: Anticipando cu e recorte di 50% ariba e vakantie-uitkering lo termina entrante 1 januari 2023, tambe lo mester cuminsa reserva bek 100% desde januari 2023. Esaki ta nifica cu e suma cu mester paga na loonbelasting y primanan social tambe lo aumenta.
Door di ahusta e reserva pa cu vakantie-uitkering y asina retene cada luna un parti di e loonbelasting y primanan social necesario, lo evita cu e loonbelasting y primanan social afecta e pago di e vakantie-uitkering. Sinembargo, pa e aña aki esaki lo tin consecuencia cu e salario netto lo bay wordo afecta.
Cambio di tarifa di loonbelasting y inkomstenbelasting: Manera a wordo comunica door di Gobierno e tarifa di loonbelasting/inkomstenbelasting a wordo ahusta entrante 1 januari 2023. E cambio aki ta encera un reduccion di e tarifa actual, cual lo mester a nifica un aumento di e salario netto.
Mester menciona cu e cambio di tarifa di loonbelasting/inkomstenbelasting lo absorba un parti di e impacto di reservacion di e vakantie-uitkering ariba e salario netto. Sinembargo, asina mes lo nota e impacto di e reservacion di 100% di vakantie-uitkering.
Gobierno ta spera cu di e forma aki por aclara e cambio den salario netto cu e empleadonan publico lo bay experencia durante e luna di januari 2023 to cu mei 2023.
