ORANJESTAD (AAN): Aruba Doet, e accion bolunario mas grandi di Aruba, ta anuncia cu Diabierna 23 di Januari ta e ultimo dia pa registra proyectonan pa Aruba Doet 2023.
Aruba Doet, cu ta organiza door di CEDE Aruba y cu sosten financiero di Oranje Fonds, ke enfatisa cu trabao boluntario ta importante pa comunidad. E ta trece cune un sentimiento di satisfaccion bou e boluntarionan
cu ta mira con nan aporte ta beneficia organizacionan den necesidad di ayudo.
Trabaonan boluntario ta planta e balor di yuda otro den esunnan di mas chikito den nos comunidad door di mira e ehempel di nan mayornan, dunando nan tambe e gana di ke bay haci algo bon y keda cu e bon sentimento di por a brinda yudansa na un cu mester. Ta p’esey mes e lema di Aruba Doet ta: “Haci bon, pasa bon”. Aruba Doet ta crea tambe un conexion entre e boluntario y e organizacion, cu e idea pa e trabao boluntario bira algo continuo na unda cu e sosten ta sigui despues di e accion.
Riba diabierna 10 y diasabra 11 di maart 2023 CEDE Aruba, den cooperacion cu Oranje Fonds, lo ta organizando Aruba Doet pa di 11 aña tras di otro! Esaki ta un oportunidad pa organizacionnan social haci trabao pa of actividadnan social cu nan grupo di interes cu ayudo di boluntarionan.
Proyectonan manera verf un muraya, duna un luga di recreaccion pa mucha un face lift, organiza un actvidad pa hende grandi of traha un heki nobo na un animal shelter.
E deadline pa inscribi un proyecto ta Dialuna 23 di Januari venidero.
Fundacionnan, scolnan, scouting clubnan, organizacionnan deportivo, Centronan di Bario cu teinda lo ke registra un proyecto por haci esaki via e website www.arubadoet.com.
Participacion den Aruba Doet ta duna e isla un impulso positivo. Organizacionan cu ta participa lo por logra metanan cu sin ayudo di boluntario nunca nan lo por a logra. Riba dje, esaki lo bira sigur un dia hopi anima y cu yen di inspiracion pa tur!
Aruba su boluntarionan simper a participa masalmente cu hopi entusiasmo y lo pone nan marca den e di 11 aña di Aruba Doet!
