Emotibo “Memorial Day Run” como homenahe postumo na Polis Tino Ruiz

Cu bunita palabranan di Minister Rocco Tjon:

ORANJESTAD (AAN) – Diadomingo 17 di Juli, den oranan di atardi, a tuma lugar un “Memorial Day Run” pa rindi un homenahe postumo den memoria di Tino Ruiz.

Minister di Husticia Rocco Tjon a dirigi palabra na famia y amigonan di Tino Ruiz, e diferente directornan di e cadena hudicial, tur atleta cu tabata presente y su ex-coleganan den Cuerpo di Polis (KPA).

Minister Tjon a señala cu e ocasion aki e ta haye sumamente importante, cu hamas laga e memoria tino bay perdi.

“Anto ta e momentonan aki ta pone nos recorda kico Tino ta nifica, specialmente pa Cuerpo Policial di Aruba y tambe pa e famianan. Mi tabata tin e honor na diferente momento di hiba combersacionnan cu e mayornan di Tino, y eynan mi a siña conoce mas di Tino, banda di locual mi mes a experiencia cune den Cuerpo Policial, e tempo ey”, Minister Tjon a expresa.

E dignatario a describi Tino Ruiz como un persona dedica na su comunidad y cu tabata duna contenido real na locual Cuerpo Policial ta para pe, esta: servicio, integridad y seguridad.

“Y mi mester bisa, cu ta tiki e polisnan cu realmente tabata duna contenido na esaki, manera Tino tabata haci.  Un colega servicial, integro y cu semper tabata bay e extra mile pa percura cu no solamente Aruba por ta sigur, pero tambe pa su coleganan por ta sigur”, Minister Tjon a remarca.

El a agrega cu ora e ta combersa cu esnan cu tabata cerca cu Tino, tur ta trece dilanti cu e tabata un colega cu tabata brinda hopi respet, pero di otro banda tambe semper e tabata demostra un dedicacion extraordinario. Pa e motibo aki, e mandatario a indica, for di un momento hopi jong den su carera caba, el a wordo selecta door di School Opleiding, pa e por ta un di e mentornan. Y semper el a duna contenido na su trabao. Na un manera excelente.

“Mi persona a ser conoci cune mas di cerca, na momento cu el a solicita pa forma parti di e team di aresto. E tempo ey, cada siman bo tabata train y traha cune di cerca. Mi mester bisa…un colega ehemplar, semper cu un dedicacion extraordinario y cu hopi respet. Y esaki tambe el a mustra su coleganan y na comunidad”, e dignatario a señala.

Minister di Husticia a remarca cu un careda, un Memorial run, no ta algo usual. Y e careda aki en particular tin un toke hopi emocional na dje, e mandatario a señala.  E mandatario a describi esaki bisando cu prome cu e careda y wak e diferente coleganan, Kustwacht tambe tabata full representa den nan uniform, y durante e ruta ora di pasa dilanti Santana y despues dilanti cas di e mayornan di Ruiz cu e famia para dilanti, e tabata algo hopi emotibo. E mandatario a reitera su gratitud na e organizadornan y el a expresa su deseo pa cada aña e ceremonia aki tuma lugar.  Finalmente, e mandatario a desea hopi forza na e famia di Tino Ruiz.