Emocionnan tabata halto na Maria College MAVO durante entrega di resultado

ORANJESTAD (AAN):   Diabierna Maria College tabata den ambiente di fin di aña escolar 2020-2021 cu e entrega di resultadonan.

Un grupo grandi di studiante, algun acompaña di amigonan y famia a acudi na nan scol pa asina haya sa si nan a slaag.

E hobennan tabata pendiente di e borchinan cu e resultadonan cu tabata indica kico lo ta nan siguiente stapnan.

Tabata tin alumnonan cu a slaag y cu a celebra di biaha nan logro, pero tambe otronan cu no a 'make it' aworaki pero cu ainda tin oportunidad. Tin un grupo di alumnonan cu no ta bay haal mas e aña escolar aki, pero cu por sigui haci nan best pa haya nan diploma di MAVO.

E emocionnan sigur tabata uno mixto y cada proceso tabata diferente pa cada studiante.

E resultado final ta refleha cu 71 % di e studiantenan a slaag.

 DIARIO ta expresa palabranan di masha pabien na tur esnan cu a slaag y na esnan cu no a haal pa sigui haci nan best. Masha pabien tambe na e team di docentenan di Maria College.