Emilio ta haya un oportunidad nobo di bay dilanti despues di a perde un pia den accidente

 Danki na Aruba Shriners Club, hoben Arubiano ta haya acceso na tratamento y protesis

ORANJESTAD – Un acto di solidaridad ta habri un caminda nobo pa Emilio Van der Linden, e hoben cu a perde un pia den un accidente di auto na dia 1 di januari di 2026, ora cu e tabata na caminda pa su trabou riba un brommer.

Despues di e desgracia, Aruba Shriners Club, cu ta cay bou di Araba Shriners Fort Myers, a tuma iniciativa pa acerca e famia Van der Linden cu un proposicion special di sosten. E organisacion a compromete nan mes pa yuda Emilio haya tratamento specialisa y un protesis den un di e 22 hospitalnan na Merca.

Diadomingo mainta, Emilio Van der Linden tabata acompaña pa su mama Mayra van der Lindern y hunto cu su tata, Emiliano “Chou” Van der Linden, a sali rumbo pa Houston, Texas, unda cu e hoben lo wordo evalua y trata pa specialistanan. E biahe a tuma luga cu acompañamento di cuater miembro di Shriners for di Merca, cu a yuda coordina e trayecto y asina garantisa cu tur cos ta cana sin problema.

Tur gasto relaciona cu e biahe, estadia y tratamento medico ta wordo cubri pa Shriners, permitiendo cu e famia por concentra riba e proceso di recuperacion y rehabilitacion di Emilio.

E gesto generoso aki ta representa un luz di speransa pa Emilio y su famia, despues di un periodo dificil marca pa e accidente cu a cambia su bida completamente. Cu sosten di Shriners, Emilio awor tin e oportunidad pa traha riba su recuperacion y mira dilanti cu mas confianza den futuro.