No ta conoci pakico el a ‘salta’ Curacao --- ORANJESTAD (AAN); E barco crusero Emerald Princess cu tin capacidad di 3.080 pasahero, ta viaha cu 1.200 miembro di tripulacion.
Tabata dos siman pasa, esta Diabierna 15 di October 2021 cu e barco aki a sali for di waf di Long Beach na California pa un viahe di 15 anochi. Dialuna siman pasa nan tabata na Puerto Vallarta na Mexico.
Despues di esey nan a viaha pa 5 dia te ora cu Diasabra 23 di October nan a pasa door di Canal di Panama. Dos dia despues, esta Dialuna 23 di October nan a yega Aruba.
Na Aruba e pasaheronan a goza di e isla, for di 7:00 am te cu 10:00 pm.
Pa Diamars 24 di October, nan schedule ta poni pa bishita Willemstad na Curacao. Pero pa motibonan ainda no comprendible, e barco a djis salta Curacao, y a bay ancra na waf di Kralendijk na Bonaire. Siendo cu riba schedule nan tabata di bishita Bonaire riba Diaranson 27 di October.
Despues di Bonaire, e barco a sali y bin bek pa Aruba, pa asina e pasaheronan a haya un ‘extra dia’ di gozo na Aruba. E no tabata riba schedule, pero toch tabata interesante pa mira asina hopi turista bek riba pia, aunke awacero a pone nan na careda den oranan di atardi. Un ‘unexpected port of call’ cu nan a probecha di dje.
Diaranson atardi e barco a bandona Aruba, pa asina move rumbo pa Port Everglades cu ta na Fort Lauderdale. E lo yega eynan Diasabra 30 di October pa 6:00 am.
Su siguiente viahenan tur lo ta saliendo for di Fort Lauderdale na Florida.
