Analisis ta mustra con dos mentira di Mike a condena Aruba --- Crecimentonan economico proclama na 2010 y 2016 nunca a existi --- Na 2010 segun economista di SER mester a reduci personal Gobierno
ORANJESTAD(AAN)- Atrobe un grupo di sindicalista kier papia cu Gobierno pa discuti e medidanan cu Gabinete Wever-Croes a tuma na 2021 y cu a inclui cu a baha e salarionan di personal di Gobierno.
E sindicatonan cu ta representa trahadornan di Gobierno a uni forsa pa papia awe di e entradanan di personal di Gobierno, cu ta entrada cu mester wordo produci dor di Pueblo di Aruba pasobra Gobierno mes no tin placa.
Momento a yega pa analisa si e hecho cu mester a baha gastonan di personal na 2021 tabata algo inhusto y si ta solamente e situacion di Covid-19 a haci esaki necesario.
Un analisis ta basa riba hechos, riba realidadnan cu ta punto di salida pa por yega na un conclusion riba e tema.
Na prome lugar ta bini e ponencia cuanto trahador e aparato di Gobierno mester pa Aruba por funciona. Pasobra ta esaki ta e esencia di trabou den Gobierno.
Na segundo lugar mester determina, si e pais tin placa pa paga mas personal cu e mester.
Ta bini naturalmente e punto si tin placa pa paga y si nunca tabata tin placa pa paga.
Cuanto trahador e aparato di Aruba mester pa por funciona? E prome pregunta, cu ta hiba nos na 2010, ora un economista renombra di SER (Conseho Social Economico di Aruba) a mustra cu Gobierno por goberna cu 1500 miembro di personal menos.
El a hustifica esaki di acuerdo cu su conocemento profesional y a mustra tambe con den sector priva mester importa trahador mientras cu Gobierno ta tuma demasiado hende na trabou.
Pues na 2010 a wordo estableci den e rapport, cu Aruba tabata por a paga 1500 empleado menos pero tambe cu tabata tin trabou pa e personanan aki den sector priva, cu mester ta e dunador mas grandi di trabou segun e sistema di economia habri y democratico.
Pues e produccion gubernamental no tabata tin necesidad di tur trahador, cu ta costa Gobierno placa.
No mester lubida cu Pueblo no ta paga solamente pa trahador pero tambe pa Cuido Medico, pa caya asfalta, pa vivienda publico, pa asistencia social pa tur cu pa malesa of edad entre otro, no por traha.
Awor e pais tabata tin placa pa paga? Aki ta caminda e rabo di porco ta krul.
Segun gobernante di e tempo, Mike Eman, Aruba tabata sumamente rico. Asina rico, cu Mike Eman a baha BBO na mita loke ta nifica cu Pueblo tabata tin menos placa pa paga trahador di Gobierno.
Pero ademas Mike Eman a papia di aumento di entradanan cu nunca a bira realidad.
Mike Eman a ciega Aruba cu e ponencia cu Valero ta bolbe Aruba na 2010 loke lo a produci un crecemento economico di 11 porciento, pa despues mustra con inflacion lo a baha e crecemento.
Pa Valero bolbe, Mike a entrega Valero tur loke Valero tabata kier pa despues despedi di Valero cu un acuerdo na fabor di Valero, pa asina Citgo por a drenta.
Ora Citgo a drenta, Mike a priminti un crecemento economico di 15 porciento, cu tampoco a bira realidad pa Aruba, cu a conoce un caida economico y financiero debi na e fracaso di Citgo y e maneho desastroso di Mike y su Gobierno.
Na 2020 Covid-19 a bati na porta pero ya tabata un hecho cu situacion financiero a haci cu mester a tuma medida pa baha gasto di Aruba, cu mester a paga pa tur debe cu Mike a laga atras.
Mester duda seriamente si Evelyn Wever-Croes como politico lo no tabata kier tur placa di mundo, pa por a aumenta tur salario di personal di Gobierno.
Ta mas cu normal cu tur gobernante lo kier tin placa pa regala tur hende pero tambe mas cu normal cu un gobernante honesto no ta bay practica mentira pa e keda gobernante.
Pa keda al caso. E necesidad di Aruba pa baha su gastonan di personal ta un invento?
Tur rapport profesional ta mustra cu mester baha e gastonan di personal di Gobierno pasobra Pueblo (cu ta inclui personal di Gobierno) no tin placa pa paga.
Awor di kico mester papia awe? Si awe, sin siguridad kico ainda Covid-19 por haci rond mundo, Gobierno paga mas na personal di Gobierno, kico ta pasa cu e pober sin entrada? Kico ta pasa cu e mucha cu mester bay school? Kico ta pasa cu futuro?
Aruba a bira victima di mentiranan cu tabata base di gobernacion entre 2009 y 2017. Awe sano huicio y sinceridad mester permiti recuperacion di Aruba, cu no tin placa pero debe grandi, cu mentiranan di Mike Eman a produci!
